கேன்டிடேட் செஸ் போட்டி: இந்திய வீரர் விதித் குஜராத்தி தோல்வி

டொரோன்டோ,

உலக சாம்பியனுடன் மோதும் வீரர், வீராங்கனை யார் என்பதை முடிவு செய்யும் கேன்டிடேட் செஸ் போட்டி கனடாவில் உள்ள டொரோன்டோ நகரில் நடந்து வருகிறது. இதில் 8 வீரர், வீராங்கனைகள் பங்கேற்றுள்ளனர். அவர்கள் தங்களுக்குள் தலா 2 முறை என்று மொத்தம் 14 சுற்றில் மோத வேண்டும். லீக் முடிவில் முதலிடத்தை பிடிக்கும் வீரர், வீராங்கனை உலக செஸ் சாம்பியன் பட்டத்துக்கான போட்டியில் நடப்பு சாம்பியனுடன் மோதும் வாய்ப்பை பெறுவார்கள்.

ஆண்கள் பிரிவில் நேற்று முன்தினம் இரவு நடந்த 4-வது சுற்று ஆட்டம் ஒன்றில் இந்திய வீரர் விதித் குஜராத்தி, ரஷியாவின் இயான் நெபோம்நியாச்சியை எதிர்கொண்டார். விறுவிறுப்பான இந்த ஆட்டத்தில் 44-வது நகர்த்தலில் விதித் குஜராத்தி தோல்வி அடைந்தார். அவர் தொடர்ச்சியாக சந்தித்த 2-வது தோல்வி இதுவாகும். முந்தைய ஆட்டத்தில் பிரக்ஞானந்தாவிடம் சறுக்கினார். ஹிகரு நகமுரா (அமெரிக்கா) - பிரக்ஞானந்தா (இந்தியா) இடையிலான ஆட்டம் 24-வது நகர்த்தலில் டிராவில் முடிந்தது. இதே போல் குகேஷ் (இந்தியா) - பேபியானோ காருனா (அமெரிக்கா), நிஜாத் அபாசவ் (அஜர்பைஜான்) - பிரோவ்ஜா அலிரெஜா (பிரான்ஸ்) ஆகியோர் மோதிய ஆட்டமும் டிரா ஆனது. 4-வது சுற்று முடிவில் இயான் நெபோம்நியாச்சி (3 புள்ளி) முதலிடத்தில் இருக்கிறார். டி.குகேஷ், பேபியானோ காருனா (தலா 2½ புள்ளி) அடுத்த இடத்தில் உள்ளனர்.

பெண்கள் பிரிவின் 4-வது சுற்று ஆட்டம் ஒன்றில் இந்திய வீராங்கனை கோனெரு ஹம்பி 62-வது நகர்த்தலில் நுர்க்யுல் சலிமோவாவிடம் (பல்கேரியா) தோல்வியை தழுவினார். இந்திய வீராங்கனை ஆர்.வைஷாலி - அலெக்சாண்ட்ரா கோரியாச்சினா (ரஷியா) இடையிலான மோதல் 40-வது நகர்த்தலில் டிராவில் முடிந்தது. கேத்ரினா லாக்னோ (ரஷியா) - டான் ஜோங்யி (சீனா), அன்னா முசிசக் (உக்ரைன்) - லீக் டிங்ஜி (சீனா) இடையிலான ஆட்டமும் டிராவில் முடிவடைந்தது. 4-வது சுற்று முடிவில் டான் ஜோங்யி (3 புள்ளி) முதலிடத்தில் தொடருகிறார். அலெக்சாண்ட்ரா கோரியாச்சினா (2½ புள்ளி) 2-வது இடத்தில் உள்ளார்.