உலகக்கோப்பை போட்டி: நெதர்லாந்து அணிக்கு எதிரான ஆட்டத்தில் பாகிஸ்தான் வெற்றி.!

ஐதராபாத்,

ஐசிசி நடத்தும் ஒருநாள் கிரிக்கெட் உலகக்கோப்பை தொடர் இந்தியாவில் நேற்றுமுதல் தொடங்கி நடைபெற்று வருகிறது. நேற்று நடைபெற்ற தொடக்க ஆட்டத்தில் இங்கிலாந்து அணியை வீழ்த்தி நியூசிலாந்து அணி அபார வெற்றி பெற்றது.

இந்த நிலையில், இன்று நடைபெற்றுவரும் 2வது லீக் போட்டியில் பாகிஸ்தான் -நெதர்லாந்து அணிகள் மோதி வருகின்றன. இந்த போட்டியில் டாஸ் வென்ற நெதர்லாந்து அணி பந்துவீச்சை தேர்வுசெய்தது. அதன்படி, பாகிஸ்தான் அணி முதலில் பேட்டிங் செய்தது.

அணியின் தொடக்க ஆட்டக்காரர்களாக களமிறங்கிய பகார் ஜமான் 12 ரன்னிலும், இமாம் உல் ஹாக் 15 ரன்னிலும் ஆட்டமிழந்தனர். அடுத்துவந்த கேப்டன் பாபர் அசாம் 5 ரன்னில் அவுட்டாகி ஏமாற்றமளித்தார். இதனால் பாகிஸ்தான் அணி 10 ஓவர்களுக்குள் 3 விக்கெட்டுகளை இழந்து தடுமாடியது.

இதனை தொடர்ந்து முகமது ரிஸ்வான், சகீல் இருவரும் நிதானமாக விளையாடி அணியை சரிவில் இருந்து மீட்டனர். இருவரும் அரைசதம் அடித்து அணிக்கு நம்பிக்கை அளித்தனர். இருவரும் தலா 68 ரன்கள் எடுத்த நிலையில், அவுட்டாகி வெளியேறினர். அடுத்து வந்த பேட்ஸ்மேன்களான இப்திகார் அகமது 9 ரன்களும், முகமது நவாஸ் 39 ரன்களும், ஷதாப் கான் 32 ரன்களும் எடுத்து ஆட்டமிழந்தனர்.

இறுதியில் பாகிஸ்தான் அணி 49 ஓவர்களில் 286 ரன்கள் எடுத்து ஆல் அவுட் ஆனது. நெதர்லாந்து அணி தரப்பில் டி லீட் அதிகபட்சமாக 4 விக்கெட்டுகளை கைப்பற்றினார். இதனை தொடர்ந்து 287 ரன்கள் எடுத்தால் வெற்றி என்ற இலக்குடன் நெதர்லாந்து அணி பேட்டிங் செய்தது.

நெதர்லாந்து அணியின் தொடக்க ஆட்டக்காரர்களாக விக்ரம்ஜித் சிங்கும், மேக்ஸ் ஓ'டவுட்டும் களமிறங்கினர். இவர்களின் மேக்ஸ் ஓ'டவுட் 5 ரன்னில் ஆட்டமிழந்து வெளியேறினார். அடுத்துவந்த காலின் அக்கர்மேன் 17 ரன்கள் எடுத்து அவுட்டானார்.

இதனை தொடர்ந்து விக்ரம்ஜித் சிங்- டி லீட் ஜோடி அணியை சரிவில் இருந்து மீட்க போராடியது. இருவரும் நிதான ஆட்டத்தை வெளிப்படுத்தி அரைசதம் அடித்தனர். இதனால் நெதர்லாந்து அணியின் ஸ்கோர் மெல்ல உயர்ந்தது.

இவர்களில் விக்ரம்ஜித் சிங் 52 ரன்கள் எடுத்து ஆட்டமிழந்தார். அடுத்துவந்த பேட்ஸ்மேன்கள் சொற்ப ரன்னில் ஆட்டமிழந்து வெளியேறினர். சிறப்பான ஆட்டத்தை வெளிப்படுத்திவந்த டி லீடும் 67 ரன்கள் எடுத்து ஆட்டமிழக்க, ஆட்டம் பாகிஸ்தானின் கட்டுப்பாட்டிற்குள் வந்தது.

இறுதியில் நெதர்லாந்து அணி 41 ஓவர்களில் 205 ரன்களுக்கு அனைத்து விக்கெட்டுகளையும் இழந்து ஆட்டமிழந்தது. இதன் மூலம் பாகிஸ்தான் அணி 81 ரன்கள் வித்தியாசத்தில் அபார வெற்றி பெற்றது. பாகிஸ்தான் தரப்பில் ஹாரிஸ் ரவுப் 3 விக்கெட்டுகளையும், ஹசன் அலி 2 விக்கெட்டுகளையும் கைப்பற்றினர்.