பெண்கள் பிரீமியர் லீக்: உ.பி. வாரியர்ஸ் அணியை வீழ்த்தி மும்பை அபார வெற்றி

புதுடெல்லி,

5 அணிகள் பங்கேற்றுள்ள 2-வது பெண்கள் பிரீமியர் லீக் (டபிள்யூ.பி.எல்.) கிரிக்கெட் போட்டி தற்போது டெல்லியில் நடைபெற்று வருகிறது. இதில் இன்று நடைபெற்ற லீக் ஆட்டத்தில் மும்பை - உ.பி. வாரியர்ஸ் அணிகள் விளையாடின.

இதில் டாஸ் வென்று முதலில் பேட்டிங் செய்த மும்பை அணி 20 ஓவர்கள் முடிவில் 6 விக்கெட் இழப்பிற்கு 160 ரன்கள் எடுத்தது. அந்த அணியில் அதிகபட்சமாக நாட் ஸ்கிவர்-ப்ரண்ட் 43 ரன்கள் எடுத்தார்.

தொடர்ந்து 161 ரன்கள் இலக்குடன் களமிறங்கிய உ.பி. வாரியர்ஸ் , மும்பை அணியின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்தது. அந்த அணியில் தீப்தி சர்மா மட்டும் சிறப்பாக விளையாடினார் .

இதனால் 20 ஓவர்கள் முடிவில் உ.பி. வாரியர்ஸ் 9 விக்கெட் இழப்பிற்கு 118 ரன்கள் மட்டுமே எடுத்தது. அதிகபட்சமாக தீப்தி சர்மா 53 ரன்கள் எடுத்தார்.

மும்பை அணியில் சைகா இஷாக் 3 விக்கெட்டுகள் வீழ்த்தினார்.

இதனால் மும்பை அணி 42 ரன்கள் வித்தியாசத்தில் அபார வெற்றி பெற்றது.