டி20 உலகக்கோப்பை; ஆப்கானிஸ்தான் அணியின் பந்துவீச்சு ஆலோசகராக வெஸ்ட் இண்டீஸ் முன்னாள் வீரர் நியமனம்

காபூல்,

20 அணிகள் கலந்து கொள்ள உள்ள டி20 உலகக்கோப்பை கிரிக்கெட் தொடர் அடுத்த மாதம் நடைபெற உள்ளது. இந்த தொடர் இந்த முறை அமெரிக்கா மற்றும் வெஸ்ட் இண்டீசில் நடைபெறுகிறது. இந்த தொடரில் கலந்து கொள்ள உள்ள 20 அணிகளில் பாகிஸ்தானை தவிர மற்ற அணி நிர்வாகங்கள் தங்கள் அணி விவரங்களை அறிவித்துவிட்டன.

இந்த தொடருக்கான ஆப்கானிஸ்தான் அணி ரஷித் கான் தலைமையில் அறிவிக்கப்பட்டுள்ளது. இந்த அணியில் முகமது நபி, இப்ராகிம் ஜட்ரான், ரஹ்மனுல்லா குர்பாஸ், அஸ்மத்துல்லா ஓமர்சாய், நூர் அகமது, நவீன் உல் ஹக், முஜீப் உர் ரஹ்மான் போன்ற வீரர்கள் இடம் பெற்றுள்ளனர்.

இந்நிலையில் டி20 உலகக்கோப்பை தொடருக்காக ஆப்கானிஸ்தான் அணியின் பந்துவீச்சு ஆலோசகராக வெஸ்ட் இண்டீஸ் முன்னாள் வீரர் டுவைன் பிராவோ நியமிக்கப்பட்டுள்ளார். இது தொடர்பான அறிவிப்பை ஆப்கானிஸ்தான் கிரிக்கெட் வாரியம் தனது எக்ஸ் வலைத்தளப்பக்கத்தில் அதிகாரபூர்வமாக அறிவித்துள்ளது.