சுனில் நரைன் அதிரடி: லக்னோவுக்கு மெகா இலக்கு நிர்ணயித்த கொல்கத்தா

லக்னோ,

ஐ.பி.எல். தொடரில் இன்று நடைபெற்று வரும் 2-வது ஆட்டத்தில் லக்னோ சூப்பர் ஜெயண்ட்ஸ் - கொல்கத்தா நைட் ரைடர்ஸ் அணிகள் விளையாடி வருகின்றன. இந்த ஆட்டத்தில் டாஸ் வென்ற லக்னோ அணியின் கேப்டன் கே.எல். ராகுல் பந்து வீச்சை தேர்வு செய்தார்.

அதன்படி முதலில் பேட்டிங் செய்ய களமிறங்கிய கொல்கத்தா அணியின் தொடக்க ஆட்டக்காரர்களாக சுனில் நரைன் - சால்ட் களமிறங்கினர். இருவரும் ஆரம்பம் முதலே அதிரடியில் வெளுத்து வாங்கினர். முதல் விக்கெட்டுக்கு 61 ரன்கள் பார்ட்னர்ஷிப் சேர்த்த நிலையில் அதிரடியாக விளையாடிய சால்ட் 32 ரன்களில் (14 பந்துகள்) ஆட்டமிழந்தார்.

பின்னர் ரகுவன்ஷி - சுனில் நரைன் ஜோடி சேர்ந்தனர். இதில் ரகுவன்ஷி நிதான ஆட்டத்தை கடைபிடிக்க மறுமுனையில் சுனில் நரைன் அதிரடியாக விளையாடினார். லக்னோ பந்து வீச்சை வெளுத்து வாங்கிய அவர் 39 பந்துகளில் 81 ரன்கள் அடித்த நிலையில் கேட்ச் முறையில் ஆட்டமிழந்தார்.

அவரை தொடர்ந்து களமிறங்கிய ரசல் 12 ரன்களிலும், நிதானமாக விளையாடிய ரகுவன்ஷி 32 ரன்களிலும் ஆட்டமிழந்தனர். பின்னர் களமிறங்கிய வீரர்களில் ரிங்கு சிங் 16 ரன்களில் ஆட்டமிழந்து இந்த முறையும் ஏமாற்றம் அளித்தார்.

கடைசி கட்டத்தில் கேப்டன் ஸ்ரேயாஸ் ஐயர் மற்றும் ரமன்தீப் சிங் அதிரடியாக விளையாடி அணி வலுவான நிலையை எட்ட உதவினர். ஸ்ரேயாஸ் 15 பந்துகளில் 23 ரன்கள் அடித்த நிலையில் அவுட்டானார். ரமன்தீப் சிங் 6 பந்துகளில் 25 ரன்கள் அடித்தார்.

நிர்ணயிக்கப்பட்ட 20 ஓவர்களில் கொல்கத்தா 6 விக்கெட்டுகளை இழந்து 235 ரன்கள் அடித்துள்ளது. அந்த அணியில் அதிகபட்சமாக சுனில் நரைன் 81 ரன்கள் அடித்தார். லக்னோ தரப்பில் அதிகபட்சமாக நவீன் உல் ஹக் 3 விக்கெட்டுகள் வீழ்த்தினார்.

இதனை தொடர்ந்து 236 ரன்கள் அடித்தால் வெற்றி என்ற மெகா இலக்கை நோக்கி லக்னோ பேட்டிங் செய்ய உள்ளது.