டி20 போட்டிகளில் விராட் கோலியின் மாபெரும் சாதனையை முறியடித்த சிக்கந்தர் ராசா

பெர்த்,

ஆஸ்திரேலியாவில் டி20 உலகக்கோப்பை நடைபெற்று வருகிறது. நேற்று நடைபெற்ற 24-வது லீக் போட்டியில் யாருமே எதிர்பாராத வகையில் பாகிஸ்தானை கத்துக்குட்டியாக கருதப்படும் ஜிம்பாப்வே வெறும் 1 ரன் வித்தியாசத்தில் தோற்கடித்து வரலாறு படைத்தது.

இந்த வெற்றியால் 2 போட்டிகளில் 3 புள்ளிகளை பெற்ற ஜிம்பாப்வே புள்ளி பட்டியலில் 3-வது இடத்திற்கு முன்னேறியது. மறுபுறம் 2 போட்டிகளில் தோல்வியடைந்த பாகிஸ்தான் நாக்-அவுட் செல்லும் வாய்ப்பையும் குறைத்துக் கொண்டுள்ளது.

ஜிம்பாப்வே அணி தரப்பில் பந்து வீச்சில் 3 முக்கிய விக்கெட்டுகளை எடுத்த சிக்கந்தர் ராசா ஆட்டநாயகனாக அறிவிக்கப்பட்டார். உலகக்கோப்பை போட்டியில் சரித்திர வெற்றியை பெற்றுக் கொடுத்த அவர் பாகிஸ்தானில் பிறந்தவர். இந்த நிலையில் அவர் அந்நாட்டுக்கு எதிராக ஜிம்பாப்வே அணிக்கு வெற்றி தேடி கொடுத்து அசத்தியுள்ளார்.

ஜிம்பாப்வேயின் கடைசி 4 வெற்றிகளில் 3 ஆட்டநாயகன் விருதுகளை வென்றுள்ள அவர் இந்த வருடம் மட்டும் டி20 கிரிக்கெட்டில் 7 ஆட்டநாயகன் விருதுகளை வென்றுள்ளார். அதன் வாயிலாக சர்வதேச டி20 கிரிக்கெட் வரலாற்றில் ஒரு காலண்டர் வருடத்தில் அதிக ஆட்டநாயகன் விருதுகளை வென்ற வீரர் என்ற விராட் கோலியின் சாதனையை தகர்த்த அவர் புதிய உலக சாதனை படைத்துள்ளார்.

1. சிக்கந்தர் ராசா : 7* (2022)

2. விராட் கோலி : 6 (2016)

3. சூர்யகுமார் யாதவ் : 5 (2022)*

4. முகமது ரிஸ்வான் : 5 (2021)

5. ஷேன் வாட்சன் : 5 (2012)