நடப்பு ஐ.பி.எல். தொடரில் ஒரு அணி எடுத்த குறைந்தபட்ச ரன்கள்: 89 ரன்களுக்கு ஆல் அவுட் ஆன குஜராத்

காந்திநகர்,

10 அணிகள் பங்கேற்கும் 17வது ஐ.பி.எல். கிரிக்கெட் தொடர் இந்தியாவின் பல்வேறு நகரங்களில் நடைபெற்று வருகிறது. அந்த வகையில் அகமதாபாத்தில் இன்று நடைபெற்றுவரும் 32வது லீக் ஆட்டத்தில் குஜராத் டைட்டன்ஸ் - டெல்லி கேப்பிட்டல்ஸ் மோதி வருகின்றன.

இப்போட்டியில் டாஸ் வென்ற டெல்லி கேப்பிட்டல்ஸ் முதலில் பந்து வீச்சு தேர்வு செய்துள்ளது. இதையடுத்து, குஜராத் டைட்டன்ஸ் தொடக்க வீரர்களாக சஹா, சுப்மன் கில் (கேப்டன்) களமிறங்கினர். கில் 8 ரன்கள் எடுத்திருந்த நிலையில் கேட்ச் மூலம் அவுட் ஆனார். சஹா 2 ரன்னில் அவுட் ஆனார். அடுத்துவந்த சாய் சுதர்சன் 12 ரன்னிலும், டேவிட் மில்லர் 2 ரன்னிலும், அபினவ் மனோகர் 8 ரன்னிலும், ஷாருக் கான் ரன் எதுவும் எடுக்காமலும் (0) அவுட் ஆகி ஏமாற்றம் அளித்தனர். குஜராத் 8.4 ஓவரில் 48 ரன்களுக்கு 6 விக்கெட்டுகள் இழந்து தடுமாறியது. ராகுல் திவேதியா 10 ரன்னிலும், மோகித் சர்மா 2 ரன்னிலும் ஆட்டம் இழந்தனர். சற்று நிலைத்து நின்று ஆடிய ரஷித் கான் அதிகபட்சமாக 23 பந்துகளில் 31 ரன்கள் எடுத்த நிலையில் அவுட் ஆனார். இறுதியில் 17.3 ஓவரில் குஜராத் டைட்டன்ஸ் அனைத்து விக்கெட்டுகளையும் இழந்து 89 ரன்களில் சுருண்டது. நடப்பு ஐ.பி.எல். தொடரில் ஒரு அணி அடித்த குறைந்தபட்ச ரன்கள் இதுவாகும்.

சிறப்பாக பந்து வீசிய டெல்லி அணியின் முகேஷ் குமார் 3 விக்கெட்டுகளையும், இஷாந்த் சர்மா 2 விக்கெட்டுகளையும், ஸ்டப்ஸ் 2 விக்கெட்டுகளையும், கலீல் அகமது, அக்சர் பட்டேல் தலா 1 விக்கெட்டையும் வீழ்த்தினர்.

90 ரன்கள் எடுத்தால் வெற்றி என்ற எளிய இலக்கை நோக்கி டெல்லி கேப்பிட்டல்ஸ் களமிறங்கி விளையாட உள்ளது.