ஆப்கானிஸ்தான் மத பள்ளிக்கூடத்தில் பீரங்கி குண்டு வெடித்து 4 சிறுவர்கள் பலி

காபூல்,

ஆப்கானிஸ்தானின் தெற்கு பகுதியில் உள்ள ஹெல்மண்ட் மாகாணம் நாட் அலி மாவட்டத்தில் மத பள்ளிக்கூடம் ஒன்று உள்ளது. நேற்று முன்தினம் மாலை இந்த மத பள்ளிக்கூடத்தை சேர்ந்த மாணவர்கள் சிலர் பள்ளிக்கூடத்துக்கு வெளியே விளையாடி கொண்டிருந்தனர்.

அப்போது, அவர்களுக்கு வெடிக்காத பீரங்கி குண்டு ஒன்று அங்கு கிடைத்துள்ளது. அது வெடிகுண்டு என்பதை அறியாத அந்த சிறுவர்கள் அதை பள்ளிக்கூடத்துக்குள் எடுத்து சென்று விளையாடினர். அப்போது சற்றும் எதிர்பாராத வகையில் திடீரென அந்த பீரங்கி குண்டு பயங்கர சத்தத்துடன் வெடித்து சிதறியது. இதில் அந்த பகுதியே அதிர்ந்தது. குண்டு வெடிப்பில் சிக்கி 7 முதல் 14 வயதுக்குட்பட்ட 4 சிறுவர்கள் சம்பவ இடத்திலேயே பரிதாபமாக உயிரிழந்தனர்.

மேலும் 3 சிறுவர்கள் படுகாயம் அடைந்தனர். அவர்கள் ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர்.