வீச்சரிவாளை காண்பித்து போலீசாரை மிரட்டிய வாலிபர் கைது

சங்கராபுரம்:

திருவண்ணாமலை மாவட்டம் அத்தியந்தல் கிராமத்தை சேர்ந்த தங்கராஜ் மகன் லோகநாதன் (வயது 34) என்பவர் சங்கராபுரம் பொய்க்குணம் சாலையில் வசித்து வருகிறார். இவர், நேற்று சங்கராபுரம் வள்ளலார் மன்றம் அருகில் வீச்சரிவாளுடன் சுற்றித்திரிந்தார். மேலும் அங்கு வந்த பொதுமக்களை திட்டி, கொலை மிரட்டல் விடுத்தார்.

கொலை மிரட்டல்

இது பற்றி தகவல் அறிந்ததும் சங்கராபுரம் போலீசார் விரைந்து சென்று லோகநாதனை பிடிக்க முயன்றனர். அப்போது லோகநாதன், தான் வைத்திருந்த வீச்சரிவாளை காண்பித்து, என்னை பிடித்தால் வெட்டி கொலை செய்து விடுவேன் என்று போலீசாரை மிரட்டினார். மேலும் போலீசாரை பணி செய்யவிடாமல் தடுத்தார்.

இருப்பினும் போலீசார் சுற்றிவளைத்து லோகநாதனை பிடித்து போலீஸ் நிலையத்துக்கு அழைத்துச் சென்றனர். அவரிடம் இருந்த வீச்சரிவாள் பறிமுதல் செய்யப்பட்டது. இது குறித்து திருக்கோவிலூர் போலீஸ் இன்ஸ்பெக்டர் (பொறுப்பு) பாலாஜி வழக்குப்பதிவு செய்து லோகநாதனை கைது செய்தார்.