போலீஸ் சப்-இன்ஸ்பெக்டர் பணிக்கான எழுத்து தேர்வு

காலை, மாலையில் நடந்தது

தமிழக காவல்துறையில் 444 போலீஸ் சப்-இன்ஸ்பெக்டர்கள் புதிதாக தேர்வு செய்யப்படுவதற்கான எழுத்து தேர்வு தமிழக சீருடை பணியாளர் தேர்வாணையம் மூலம் நேற்று தமிழகம் முழுவதும் நடந்தது. இதில் நேற்று காலையில் முதன்மை எழுத்து தேர்வும், மாலையில் தமிழ் மொழிக்கான தகுதி தேர்வும் நடந்தது.

அதன்படி இந்த தேர்வு பெரம்பலூர் மாவட்டத்தில் பெரம்பலூர்-துறையூர் நெடுஞ்சாலையில் உள்ள தனலட்சுமி சீனிவாசன் கல்வி குழும வளாகத்தில் உள்ள கலை-அறிவியல் கல்லூரி, பொறியியல் கல்லூரியில் 80 அறைகளில் நடந்தது.

1,526 பேர் விண்ணப்பித்திருந்தனர்

இந்த தேர்வினை எழுதுவதற்காக பெரம்பலூர் மாவட்டத்தில் இருந்து 1,187 ஆண் தேர்வர்களும், 339 பெண் தேர்வர்களும் என மொத்தம் 1,526 பேர் விண்ணப்பித்திருந்தனர். அவர்கள் தேர்வு மையத்துக்கு காலை 8 மணி முதலே வர தொடங்கினர். அவர்களை போலீசார் மெட்டல் டிடெக்டர் எந்திரம் வழியாக வரவழைத்து சோதனையிட்டும், மெட்டல் டிடெக்டர் கருவி மூலம் சோதனையிட்டும் தேர்வு மையத்திற்கு உள்ளே அனுமதித்தனர்.

மேலும் தேர்வு அறைக்குள் செல்போன் உள்ளிட்ட மின்னணு சாதனங்கள் கொண்டு செல்ல அனுமதி கிடையாது என்பதால், தேர்வர்கள் கொண்டு வந்திருந்த செல்போன் உள்ளிட்ட மின்னணு சாதனங்களை போலீசார் ெபற்று பாதுகாப்பாக வைத்திருந்தனர்.

1,255 பேர் எழுதினர்

தேர்வு அறைக்குள் சென்ற தேர்வர்களுக்கு காலை 9.45 மணியளவில் ஓ.எம்.ஆர். விடைத்தாள், அறை கண்காணிப்பாளர்களால் வழங்கப்பட்டது. காலை 10 மணியளவில் கேள்வித்தாள் கொடுக்கப்பட்டு தேர்வு தொடங்கியது. மதியம் 12.30 மணிக்கு முதன்மை எழுத்து தேர்வு முடிந்தது. பின்னர் மாலை 3.30 மணியளவில் தமிழ் தகுதி தேர்வு தொடங்கியது. அந்த தேர்வு மாலை 5.10 மணிக்கு முடிவடைந்தது. காலை, மாலை நடந்த தேர்வினை போலீஸ் ஐ.ஜி. (நலன்) சம்பத்குமார், பெரம்பலூர் மாவட்ட போலீஸ் சூப்பிரண்டு மணி ஆகியோர் நேரில் சென்று பார்வையிட்டு ஆய்வு செய்தனர்.

பெரம்பலூரில் நடந்த தேர்வை 977 ஆண்களும், 278 பெண்களும் என மொத்தம் 1,255 பேர் எழுதினர். 210 ஆண்களும், 61 பெண்களும் என மொத்தம் 271 பேர் தேர்வு எழுத வரவில்லை. புதிய போலீஸ் சப்-இன்ஸ்பெக்டர் தேர்வில் காவல்துறையில் வேலை செய்பவர்களுக்கு 20 சதவீதம் ஒதுக்கீடு உள்ளது. இவர்களுக்கு இன்று (ஞாயிற்றுக்கிழமை) தனியாக எழுத்து தேர்வு நடைபெற உள்ளது. தமிழுக்கான தகுதி தேர்வும் தனியாக நடைபெறுகிறது.