மோட்டார் சைக்கிள் சக்கரத்தில் சேலை சிக்கி பெண் பலி

திருவேங்கடம்:

திருவேங்கடம் அருகே கணவருடன் மோட்டார் சைக்கிளில் சென்றபோது சக்கரத்தில் சேலை சிக்கியதால் தூக்கி வீசப்பட்ட பெண் பலியானார்.

சக்கரத்தில் சேலை சிக்கியது

தென்காசி மாவட்டம் திருவேங்கடம் அருகே உள்ள சங்குபட்டி கிராமம் நடுத்தெருவை சேர்ந்தவர் சக்திவேல். கூலி தொழிலாளியான இவரது மனைவி மாரீஸ்வரி (வயது 40). இவர்கள் 2 பேரும் சம்பவத்தன்று சங்கரன்கோவிலுக்கு சென்று விட்டு மோட்டார் சைக்கிளில் வீடு திரும்பிக் கொண்டிருந்தனர்.

திருவேங்கடம் அருகே பெருங்கோட்டூர் அடுத்த அழகாபுரி வளைவில் வந்தபோது எதிர்பாராத விதமாக மாரீஸ்வரியின் சேலை மோட்டார் சைக்கிளின் சக்கரத்தில் சிக்கியது. இதனால் நிலைதடுமாறிய மோட்டார் சைக்கிளில் இருந்து 2 பேரும் தூக்கி வீசப்பட்டு படுகாயம் அடைந்தனர்.

பெண் பலி

இதுகுறித்து தகவல் அறிந்த திருவேங்கடம் போலீசார் சம்பவ இடத்திற்கு விரைந்து சென்று, 2 பேரையும் மீட்டு சிகிச்சைக்காக ஆஸ்பத்திரிக்கு அனுப்பி வைத்தனர். அவர்களுக்கு முதலுதவி சிகிச்சை அளிக்கப்பட்டு, மேல் சிகிச்சைக்காக பாளையங்கோட்டை அரசு ஆஸ்பத்திரிக்கு அனுப்பி வைக்கப்பட்டனர். அங்கு சிகிச்சை பலனின்றி மாரீஸ்வரி பரிதாபமாக இறந்தார்.

இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகிறார்கள்.