சேலத்தில் போலி சப்-இன்ஸ்பெக்டர் கைது:சிறையில் பழகிய ரவுடிகள் மூலம் கஞ்சா கடத்தியது அம்பலம்போலீஸ் விசாரணையில் பரபரப்பு தகவல்

சேலம்

சேலத்தில் கைதான போலி சப்-இன்ஸ்பெக்டர் சிறையில் பழகிய ரவுடிகள் மூலம் ஈரோட்டுக்கு கஞ்சா கடத்தியது போலீசார் விசாரணையில் தெரியவந்தது.

போலி சப்-இன்ஸ்பெக்டர் கைது

ரெயில்களில் கஞ்சா மற்றும் போதை பொருட்களை கடத்தலை தடுக்க ரெயில்வே போலீசார் தீவிர சோதனை நடத்தி வருகின்றனர். நேற்று தன்பாத்-ஆலப்புழா எக்ஸ்பிரஸ் ரெயிலில் போலீசார் சோதனை நடத்தினர். அப்போது தர்மபுரி மாவட்டம் பொம்மிடி அருகே உள்ள நடூர் குறிஞ்சிப்பட்டியை சேர்ந்த அப்துல்முகீத் (வயது24) என்பவர் 5 கிலோ கஞ்சா கடத்திய தெரியவந்தது. இதையடுத்து அவரை ரெயில்வே போலீசார் கைது செய்து விசாரித்தனர்.

மேலும் அவர் போலி சப்-இன்ஸ்பெக்டருக்கான அடையாள அட்டை வைத்திருந்தது கண்டுபிடிக்கப்பட்டது. இதையடுத்து அப்துல்முகீத் சேலம் போதை பொருள் கடத்தல் தடுப்பு பிரிவு போலீசாரிடம் ஒப்படைக்கப்பட்டார். அதைத்தொடர்ந்து அவரிடம் இன்ஸ்பெக்டர் பாபு சுரேஷ்குமார் தலைமையிலான போலீசார் விசாரணை நடத்தினர். இதில் பரபரப்பு தகவல் வெளியாகி உள்ளது.

இதுகுறித்து போலீஸ் அதிகாரிகள் கூறியதாவது:-

ரவுடிகளுடன் பழக்கம்

கஞ்சா கடத்தலில் கைதான அப்துல்முகீத் கடந்த ஆகஸ்டு மாதம் செங்கல்பட்டியில் உள்ள தனியார் கல்லூரிக்கு சென்றார். அங்கு அவர் போலி சப்-இன்ஸ்பெக்டருக்கான அடையாள அட்டையை காண்பித்து ஒரு எம்.டெக் சீட் கேட்டு மிரட்டி உள்ளார். இதுதொடர்பாக அவர் மீது மறைமலைநகர் போலீசில் புகார் கொடுக்கப்பட்டது.

அதன்பேரில் போலீசார் அவரை கைது செய்து செங்கல்பட்டு சிறையில் அடைத்தனர். அப்போது அவருக்கு சிறையில் இருந்த சில ரவுடிகளுடன் பழக்கம் ஏற்பட்டது. அவரிடம் ஒடிசாவில் இருந்து கஞ்சாவை கடத்தி வந்து ஈரோட்டில் கொடுத்தால் ரூ.10 ஆயிரம் கொடுப்பதாக ரவுடிகள் தெரிவித்தனர். இதையடுத்து நிபந்தனை ஜாமீனில் வெளியே வந்த அவர் ரெயிலில் கஞ்சாவை கடத்தி வந்த போது போலீசாரிடம் சிக்கினார்.

இவ்வாறு அவர்கள் கூறினர்.

மேலும் கஞ்சா கடத்த கூறிய ரவுடிகளை பிடிக்க போலீசார் நடவடிக்கை எடுத்து வருகின்றனர்.