தேனி: மது போதையில் கிணற்றில் தவறி விழுந்த முதியவர் - 3 நாட்களுக்குப் பிறகு உயிருடன் மீட்பு

தேனி,

தேனி மாவட்டம் போடிநாயக்கனூர் அருகே சிலமரத்துப்பட்டி பகுதியைச் சேர்ந்த 65 வயது முதியவர் ஒருவர், கடந்த செவ்வாய்க்கிழமை கோவில் திருவிழாவிற்குச் சென்றுவிட்டு மது அருந்தியுள்ளார்.

இதையடுத்து மது போதையில் திரும்பி வந்த முதியவர், வரும் வழியில் சோளத் தோட்டத்தில் உள்ள 60 அடி ஆழ கிணற்றில் தவறி விழுந்துள்ளார். அந்த முதியவரின் குடும்பத்தினர் 3 நாட்களாக அவரை தேடி வந்த நிலையில், அவர் கிணற்றில் தவறி விழுந்திருப்பது தெரியவந்துள்ளது.

இது குறித்து உடனடியாக தீயணைப்புத்துறையினருக்கு தகவல் தெரிவிக்கப்பட்ட நிலையில், அங்கு வந்த தீயணைப்பு வீரர்கள், கிணற்றில் உயிருக்குப் போராடிக் கொண்டிருந்த முதியவரை கயிறு கட்டி பத்திரமாக மீட்டனர். உடலில் சிறு காயங்களோடு அந்த முதியவர் சிகிச்சைக்காக மருத்துவமனைக்கு அனுப்பி வைக்கப்பட்டார்.