தொழிலாளி வீட்டில் நகை, பணம் திருட்டு

கடையநல்லூர்:

கடையநல்லூர் இந்திராநகர் புதுகாலனி ஆதிதிராவிடர் மாணவர் விடுதி அருகில் வசிப்பவர் கோவிந்தன். செருப்பு தைக்கும் தொழிலாளி. இவரது மனைவி, கடையநல்லூர் நகராட்சியில் தூய்மை பணியாளராக உள்ளார். நேற்று முன்தினம் காலையில் கணவன்-மனைவி இருவரும் வேலைக்கு சென்று விட்டு, மாலையில் வீட்டுக்கு திரும்பி வந்தனர்.

அப்போது வீட்டின் கதவு உடைக்கப்பட்டு, பீரோவில் இருந்த 11 கிராம் தங்க மோதிரங்கள், ரூ.15 ஆயிரம் திருட்டு போனதை அறிந்து அதிர்ச்சி அடைந்தனர். அவர்களது வீட்டில் ஆட்கள் இல்லாததை நோட்டமிட்ட மர்மநபர்கள் பட்டப்பகலில் வீடுபுகுந்து நகை, பணத்தை திருடியது தெரியவந்தது. இதுகுறித்த புகாரின்பேரில், கடையநல்லூர் போலீசார் வழக்குப்பதிவு செய்து விசாரணை நடத்தி வருகின்றனர்.