ஓடும் கார் தீயில் எரிந்து நாசம்

நாமக்கல் மாவட்டம், குமாரபாளையம் எம்.ஜி.ஆர். நகரை சேர்ந்தவர் ஜெகநாத் (வயது 34). இவர் நேற்று தனது காரில் தேனியில் இருந்து கரூர் மாவட்டம், அரவக்குறிச்சி வழியாக நாமக்கலுக்கு சென்று கொண்டிருந்தார். அந்த கார் அரவக்குறிச்சி பெத்தான்கோட்டை அருகே சென்று கொண்டிருந்தபோது, காருக்கு டீசல் நிரப்பவதற்காக அப்பகுதியில் உள்ள பெட்ரோல் விற்பனை நிலையத்திற்கு சென்று ஜெகநாத் காரை நிறுத்தினார். அப்போது காரின் முன் பகுதியில் இருந்து புகை வந்துள்ளது. இதனால் சுதாரித்து கொண்ட ஜெகநாத் காரை பெட்ரோல் விற்பனை நிலையத்தில் இருந்து சற்று தொலைவில் கொண்டு சென்று நிறுத்தி விட்டு கீழே இறங்கினார். பின்னர் கார் தீப்பிடித்து கொழுந்து விட்டு எரிய ஆரம்பித்தது. இதுகுறித்து தகவல் அறிந்த அரவக்குறிச்சி தீயணைப்பு படைவீரர்கள் சம்பவ இடத்திற்கு தண்ணீரை பீய்ச்சி அடித்து தீயை அணைத்தனர். இருப்பினும் கார் முற்றிலும் எரிந்து நாசமானது. கார் எப்படி தீப்படித்தது என அரவக்குறிச்சி போலீசார் தீவிர விசாரணை நடத்தி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியது.