மோட்டார் சைக்கிளுக்கு தீ வைத்தவர் கைது

சேரன்மாதேவி:

பத்தமடை அருகே உள்ள மணிமுத்தான்குளம் பெருமாள் கோவில் தெருவை சேர்ந்த ராஜ்நாராயணன் என்பவரின் குடும்பத்திற்கும், அதே பகுதியை சேர்ந்த முத்துக்குமார் என்பவரது குடும்பத்திற்கும் இடப்பிரச்சினை காரணமாக தகராறு ஏற்பட்டு முன்விரோதம் இருந்து வந்தது.

இந்த நிலையில் ராஜ்நாராயணனின் வீட்டிற்குள் முத்துக்குமாரின் மகன்கள் முத்து கணேஷ், மாரிகணேஷ் மற்றும் அவருடைய உறவினரான மேலச்செவல் சர்ச் தெருவைச் சேர்ந்த ராஜா (40) ஆகியோர் நுழைந்தனர். அங்கிருந்த ராஜ்நாராயணன் மகனை அவதூறாக பேசி, ரூ.69 ஆயிரத்தை எடுத்துக் கொண்டும், ஜன்னல் கண்ணாடிகளை உடைத்தும், வீட்டின் முன் நிறுத்தி வைக்கப்பட்டு இருந்த மோட்டார் சைக்கிளை தீவைத்து எரித்தும் சென்றதாக கூறப்படுகிறது.

இதுகுறித்த புகாரின் பேரில் பத்தமடை போலீசார் வழக்குப்பதிவு செய்து, ராஜாவை கைது செய்தனர்.