மக்னா யானையை இரவு, பகலாக கண்காணிக்கும் வனத்துறையினர்

வால்பாறை

சின்னக்கல்லார் குடியிருப்பு பகுதியில் நுழைந்து விடாமல் தடுக்க மக்னா யானையை இரவு, பகலாக வனத்துறையினர் கண்காணித்து வருகின்றனர். மேலும் அடர்ந்த வனப்பகுதிக்குள் விரட்ட நடவடிக்கை எடுத்து வருகின்றனர்.

மக்னா யானை

கோவை மாவட்டம் பொள்ளாச்சி அருகே உள்ள சரளப்பதி பகுதியில் மக்னா யானை ஒன்று அட்டகாசம் செய்து வந்தது. அந்த யானையை நேற்று முன்தினம் அதிகாலையில் வனத்துறையினர் மயக்க ஊசி செலுத்தி பிடித்து, வால்பாறை அருகே சின்னக்கல்லார் வனப்பகுதியில் விட்டனர்.

லாரியில் இருந்து இறக்கிவிட்டதும் அந்த யானை, அடர்ந்த வனப்பகுதிக்குள் சென்று விடும் என்று வனத்துறையினர் எதிர்பார்த்தனர். ஆனால் அடர்ந்த வனப்பகுதிக்குள் செல்லாமல் சின்னக்கல்லார் நீர்வீழ்ச்சிக்கு செல்லும் வழியில் உள்ள டேன்டீ தொழிலாளர்களின் குடியிருப்பை ஒட்டிய வனப்பகுதிக்கு சென்றது. அங்கேயே தொடர்ந்து உலா வருவதால், அப்பகுதியை சேர்ந்த டேன்டீ தொழிலாளர்கள் பீதி அடைந்து உள்ளனர்.

தீவிர கண்காணிப்பு

இந்த நிலையில் ஆனைமலை புலிகள் காப்பகத்தின் துணை கள இயக்குனர் பார்க்கவேதேஜா உத்தரவின் பேரில் மானாம்பள்ளி வனச்சரகர் மணிகண்டன் தலைமையிலான குழுவினர் சின்னக்கல்லார் பகுதியில் சிறப்பு முகாம் அமைத்து இரவு, பகலாக அந்த யானையை கண்காணித்து வருகின்றனர். ஒரு மணி நேரத்துக்கு ஒரு முறை ரேடியோ காலர் மூலமாகவும், 'டிரோன்'(ஆளில்லா குட்டி விமானம்) மூலமாகவும் கண்காணிப்பு பணி நடக்கிறது. அந்த யானை தற்போது டேன்டீ தொழிலாளர்கள் குடியிருப்பை ஒட்டி சின்னக்கல்லார் ஆற்றின் கரையோரமாக உள்ள வனப்பகுதியில் நடமாடி வருவது உறுதி செய்யப்பட்டு உள்ளது. அது குடியிருப்பு பகுதிக்குள் நுழைந்து விடாமல் தடுக்க வனத்துறையினர் தொடர்ந்து தீவிர கண்காணிப்பு பணியில் ஈடுபட்டு வருகின்றனர். மேலும் அடர்ந்த வனப்பகுதிக்குள் விரட்ட நடவடிக்கை எடுத்து வருகின்றனர்.