அட்டகாசம் செய்த கரடி சிக்கியது; வனத்துறையினர் கூண்டு வைத்து பிடித்தனர்

களக்காடு:

நெல்லை அருகே ஊருக்குள் புகுந்து அட்டகாசம் செய்த கரடியை, வனத்துறையினர் கூண்டு வைத்து பிடித்தனர்.

கரடி அட்டகாசம்

நெல்லை அருகே உள்ள முத்தூர் கிராமத்தில் கரடி ஒன்று புகுந்து அட்டகாசம் செய்து வந்தது. இதையடுத்து கரடியை கூண்டு வைத்து பிடிக்க வேண்டும் என்று பொதுமக்கள், வனத்துறையினருக்கு கோரிக்கை விடுத்தனர்.

அதன்படி கரடி நடமாட்டத்தை வனத்துறையினர் தீவிரமாக கண்காணித்தனர். பின்னர் அதனை பிடிப்பதற்காக கடந்த சில நாட்களுக்கு முன்பு இரும்புக் கூண்டு வைத்தனர்.

கூண்டில் சிக்கியது

இந்த கூண்டில் நேற்று கரடி சிக்கியது. இதுபற்றிய தகவல் அறிந்ததும் நெல்லை வனச்சரகர் சரவணகுமார், வனவர் அழகர்சாமி ஆகியோரின் தலைமையிலான வனத்துறை குழுவினரும் மற்றும் களக்காடு முண்டந்துறை புலிகள் காப்பக மருத்துவர் மனோகரன் தலைமையிலான மருத்துவக் குழுவினரும் விரைந்து சென்று பார்வையிட்டனர்.

பின்னர் கரடியை மீட்டு களக்காடு சரணாலயம் முத்தலாறு வனப்பகுதியில் உதவி உயிரின பாதுகாவலர் பயிற்சி மற்றும் களக்காடு வனப்பணியாளர்களின் முன்னிலையில் பாதுகாப்பாக விட்டனர்.