கடையம் அருகே பயங்கரம்; புதுப்பெண் கழுத்தை அறுத்துக் கொலை

கடையம்:

கடையம் அருகே புதுப்பெண் கழுத்தை அறுத்துக் கொலை செய்யப்பட்டார். இந்த வெறிச்செயலில் ஈடுபட்ட மர்மநபர்களை போலீசார் வலைவீசி தேடிவருகிறார்கள்.

பிணமாக கிடந்த இளம்பெண்

தென்காசி மாவட்டம் கடையம் அருகே துப்பாக்குடி காட்டுப்பகுதியில் நேற்று இளம்பெண் ஒருவர் ரத்தக்காயங்களுடன் பிணமாக கிடந்தார். இதை பார்த்த அந்த வழியாக சென்றவர்கள் அதிர்ச்சி அடைந்தனர்.

இதுகுறித்து உடனடியாக ஆழ்வார்குறிச்சி போலீசுக்கு தகவல் தெரிவிக்கப்பட்டது. போலீசார் சம்பவ இடத்திற்கு விரைந்து சென்றனர். அப்போது, அந்த இளம்பெண் கழுத்து அறுக்கப்பட்ட நிலையில் பிணமாக கிடந்தது தெரியவந்தது. பின்னர் உடலை போலீசார் கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

திருமணம்

கொலை செய்யப்பட்ட பெண் யார்? என்று போலீசார் நடத்திய விசாரணையில் பரபரப்பு தகவல்கள் வெளியானது. அதுபற்றிய விவரம் வருமாறு:-

நெல்லை மாவட்டம் கல்லிடைக்குறிச்சி பகுதியைச் சேர்ந்தவர் இசக்கிமுத்து. இவருடைய மகள் இசக்கிலட்சுமி (வயது 23). இவருக்கும் அதே பகுதியைச் சேர்ந்த ஒரு வாலிபருக்கும் இருவீட்டார் சம்மதத்துடன் திருமணம் நிச்சயிக்கப்பட்டது. இவர்களின் திருமணம் கடந்த 1-ந் தேதி நடக்க இருந்தது.

வாலிபருடன் ஓட்டம்

இதற்கிடையே, இசக்கிலட்சுமி அதே பகுதியைச் சேர்ந்த ராம்குமார் (25) என்பவருடன் திருமணத்திற்கு முந்தைய நாளான கடந்த 31-ந் தேதியே வெளியூருக்கு ஓடிவிட்டார்.

இதனால் அதிர்ச்சி அடைந்த இசக்கிமுத்து இதுகுறித்து கல்லிடைக்குறிச்சி போலீசில் புகார் செய்து இருந்தார். போலீசார் விசாரணை நடத்தி, 2 பேரையும் தேடி வந்தனர். வெளியூர் சென்ற இவர்கள் மதுரையில் வைத்து திருமணம் செய்து கொண்டதாக கூறப்படுகிறது.

பின்னர் ராம்குமார், இசக்கிலட்சுமி ஆகியோர் சென்னையில் தங்கி இருந்தனர். அப்போது, அவர்களுக்குள் பிரச்சினை ஏற்பட்டதாக தெரிகிறது. இதனால் இசக்கிலட்சுமி தனது சொந்த ஊருக்கு திரும்பி வந்துவிட்டார். அங்குள்ள உறவினர் வீட்டில் அவர் தங்கி இருந்தார்.

கழுத்தை அறுத்துக்கொலை

இந்த நிலையில் மர்மநபர்கள் 2 பேர் மோட்டார் சைக்கிளில் இசக்கிலட்சுமி தங்கி இருக்கும் வீட்டிற்கு சென்றனர். அங்கு இருந்த இசக்கிலட்சுமியை அழைத்து மோட்டார் சைக்கிளில் ஏற்றிச் சென்றனர்.

பின்னர் துப்பாக்குடி காட்டுப்பகுதியில் வைத்து இசக்கிலட்சுமியை மர்மநபர்கள் கத்தியால் கழுத்தை அறுத்துக் கொைல செய்துவிட்டு தப்பிச்சென்று விட்டார்கள்.

மேற்கண்ட தகவல் போலீஸ் விசாரணையில் தெரியவந்தது.

போலீஸ் வலைவீச்சு

இந்த சம்பவம் குறித்து ஆழ்வார்குறிச்சி போலீசார் வழக்குப்பதிவு செய்தனர். ெகாலைக்கான காரணம் என்ன?, கொலையாளிகள் யார்? என்பது குறித்து போலீசார் தீவிர விசாரணை நடத்தி வருகிறார்கள். மேலும், மர்மநபர்களை வலைவீசி தேடிவருகிறார்கள்.

கடையம் அருகே புதுப்பெண் கழுத்தை அறுத்துக் கொலை செய்யப்பட்ட பயங்கர சம்பவம் பரபரப்பை ஏற்படுத்தி உள்ளது.