ஒண்டி வீரன் நினைவு நாள் - தபால் தலையை வெளியிட்டார் தமிழக கவர்னர் ஆர்.என்.ரவி

சென்னை,

75-வது இந்திய சுதந்திர தினத்தை முன்னிட்டு நாடு முழுவதும் பல்வேறு கொண்டாட்டங்கள் நடைபெற்று வருகின்றன. அதன் ஒருபகுதியாக அறியப்படாத சுதந்திர போராட்ட வீரர்களை கவுரவப்படுத்தும் விதமாக பல்வேறு நிகழ்ச்சிகளும் நடைபெற்று வருகின்றன. மத்திய தகவல் தொடர்புத்துறை அமைச்சகம் சார்பில் பல்வேறு நிகழ்ச்சிகள் ஏற்பாடு செய்யப்பட்டு வரும் நிலையில் தபால் துறையோடு இணைந்து இன்றையதினம் ஒண்டி வீரன் தபால் தலை வெளியீட்டு விழா நடைபெற்று வருகிறது.

சுதந்திர போராட்டவீரர் ஒண்டிவீரனின் 251-வது நினைவுதினம் இன்று அநுசரிக்கப்படும் நிலையில் மத்திய தகவல் தொடர்புத்துறை அமைச்சகம் மற்றும் தபால் துறையின் சார்பில் ஒண்டிவீரனின் தபால் தலை வெளியிடப்பட்டுள்ளது.

இந்த நிகழ்ச்சியில் தமிழக கவர்னர் ஆர்.என்.ரவி தபால் தலையை வெளியிட தெலங்கானா கவர்னர் தமிழிசை சவுந்தரராஜன் தபால் தலையை பெற்றுக்கொண்டு அவரது குடும்பத்தினரிடம் ஒப்படைத்திருக்கிறார்கள். இந்த தபால் தலை வெளியீட்டு விழாவில் மத்திய மந்திரி எல்.முருகன், அமைச்சர் மதிவேந்தன் உள்ளிட்டோர் கலந்து கொண்டனர்.