உற்சாகத்துடன் பள்ளிக்கு வந்த மாணவ, மாணவிகள்

தமிழகத்தில் கோடை விடுமுறைக்கு பிறகு நேற்று 6-ம் வகுப்பு முதல் பிளஸ்-2 வரை பள்ளிகள் திறக்கப்பட்டன. அதன்படி ராணிப்பேட்டை மாவட்டத்தில், முதல் நாளில் மாணவ - மாணவிகள் உற்சாகத்துடன் பள்ளிக்கு வந்தனர். ஏராளமான மாணவ, மாணவிகள் புத்தாடை அணிந்து பள்ளிக்கு வந்தனர்.

ஒரு சில பள்ளிகளில் மாணவ - மாணவிகளுக்கு ஆசிரியர்கள் இனிப்பு கொடுத்து வரவேற்றனர். நீண்ட நாட்களுக்குப் பிறகு மாணவர்கள் ஒருவரை ஒருவர் சந்தித்த மகிழ்ச்சியில் கட்டி அணைத்து தங்களது ஆனந்தத்தை வெளிப்படுத்தினர்.

மேலும் கோடை விடுமுறை பற்றி தங்களது நிகழ்வுகளை பகிர்ந்து கொண்டனர். பல நாட்களாக அமைதியாக காட்சியளித்த பள்ளி வகுப்பறை கட்டிடங்கள் மாணவர்களின் வருகையால் கலகலப்பாக காணப்பட்டது. முத்துக்கடை, ஆற்காடு, வாலாஜா, அரக்கோணம், சோளிங்கர் மற்றும் முக்கிய ஊர்களில் உள்ள பஸ் நிலையங்கள் காலை மற்றும் மாலை நேரங்களில் மாணவர்களின் வருகையால் நிரம்பி வழிந்தது.