அபுதாபியில் இருந்து கடத்தல்: சென்னை விமான நிலையத்தில் ரூ.2 கோடி தங்கம் பறிமுதல் - 4 பேர் கைது

சென்னை மீனம்பாக்கம் பன்னாட்டு விமான நிலையத்திற்கு வெளிநாடுகளில் இருந்து பெரும் அளவில் தங்கம் கடத்தி வரப்படுவதாக சுங்க இலாகா அதிகாரிகளுக்கு தகவல் கிடைத்தது. அப்போது அபுதாபியில் இருந்து சென்னை வந்த 4 பயணிகளை சந்தேகத்தின்பேரில் நிறுத்தி விசாரித்தனர். 4 பேரும் முன்னுக்கு பின் முரணாக பேசியதால் அவர்களது உடைமைகளை சோதனை செய்தனர்.

அதில் விலையுர்ந்த 20 ஐபோன்கள், லேப்டாப்கள், சிகரெட்டு பாக்கெட்டுகள் மறைத்து வைத்து கடத்தி வந்ததை கண்டுபிடித்தனர். பின்னர் 4 பேரை தனி அறைக்கு அழைத்து சென்று சோதனை செய்தனர். அப்போது அவர்களது உள்ளாடைக்குள் தங்கத்தை மறைத்து வைக்கப்பட்டு இருந்ததை கண்டுபிடித்தனர்.

இதையடுத்து, 4 பேரிடம் இருந்து ரூ.1 கோடியே 83 லட்சம் மதிப்புள்ள 3 கிலோ 422 கிராம் தங்கத்தை சுங்க அதிகாரிகள் கைப்பற்றினர். மேலும், ரூ.25 லட்சத்து 20 ஆயிரம் மதிப்புள்ள ஐபோன்கள், லேப்டாப்கள், சிகரெட்டுகள் ஆகியவற்றை கைப்பற்றினர்.

சென்னை விமான நிலையத்தில் ஒரே நாளில் நடத்திய சோதனையில் 4 பயணிகளிடம் இருந்து ரூ.2 கோடியே 8 லட்சம் மதிப்புடைய 3 கிலோ 422 கிராம் தங்கமும் லேப்டாப்கள், சிக்ரெட்டுகள், ஐபோன்களும் பறிமுதல் செய்யப்பட்டது குறிப்பிடத்தக்கது. இதுதொடர்பாக 4 பேரை கைது செய்த சுங்க இலாகா அதிகாரிகள், இதன் பின்னணியில் உள்ளவர்கள் யார்? என்பது குறித்து விசாரித்து வருகின்றனர்.