கிரிக்கெட் போட்டியில் வெற்றி பெற்ற அணிக்கு பரிசு

தட்டார்மடம்:

சாத்தான்குளம் இமயம் கிரிக்கெட் கிளப் சார்பில் மாவட்ட அளவிலான கிரிக்கெட் போட்டிகள் நடைபெற்றது. இதில் 32 அணிகள் கலந்து கொண்டன. இறுதி போட்டியில் சாத்தான்குளம் இமயம் கிரிக்கெட் அணியும், நேதாஜி ஸ்போர்ட்ஸ் கிளப் அணியும் மோதின. இதில் நேதாஜி அணி வென்று முதல் பரிசை தட்டிச்சென்றது.

பின்னர் நடந்த பரிசளிப்பு விழாவுக்கு ஊர் தலைவர் சித்திரைவேல் தலைமை தாங்கினார். விடுதலை சிறுத்தைகள் கட்சி நகர செயலாளர் ராமச்சந்திரன் முன்னிலை வகித்தார். விழாவில் முதலிடம் பிடித்த நேதாஜி அணிக்கு ஸ்ரீவைகுண்டம் சட்டப்பேரவை உறுப்பினர் ஊர்வசி எஸ்.அமிர்தராஜ் சார்பாக ரூ.15 ஆயிரம் ரொக்கப்பரிசு மற்றும் வெற்றி கோப்பைய வட்டார காங்கிரஸ் கமிட்டி தலைவர் பார்த்தசாரதி வழங்கினார். 2-வது இடம் பிடித்த சாத்தான்குளம் இமயம் கிரிக்கெட் கிளப் அணியினருக்கு ரூ.13 ஆயிரம் மற்றும் பரிசு கோப்பையை முதலூர் பஞ்சாயத்து தலைவர் பொன்முருகேசன் வழங்கினார்.

விழாவில் சாத்தான்குளம் பேரூராட்சி கவுன்சிலர் லிங்கபாண்டி, கணேஷ், வக்கீல் வசந்த் அகஸ்டின், இளைஞர் காங்கிரஸ் ரீகன், இசக்கி, உள்ளிட்ட பலர் கலந்து கொண்டனர். போட்டி ஏற்பாடுகளை இமயம் கிரிக்கெட் அணி நிர்வாகிகள் சிவா, புனித ராஜ், ஹரி சக்தி, முத்து உள்ளிட்டோர் செய்திருந்தனர்.