பொன்னேரி அரசு பள்ளி மாணவர்கள் சாதனை

ஜோலார்பேட்டையில் உள்ள சிறு விளையாட்டு அரங்கில் மாவட்ட அளவில் முதல்-அமைச்சர் கோப்பைக்கான விளையாட்டுப் போட்டிகள் நடைபெற்றது. இதில் ஜோலார்பேட்டையை அடுத்த பொன்னேரி அரசு மேல்நிலைப்பள்ளி மாணவர்கள் மற்றும் மாற்றுத்திறனாளி மாணவர்கள் கபடி, கைப்பந்து, ஓட்டப்பந்தயம், சிலம்பம் உள்ளிட்ட பல்வேறு போட்டிகளில் பங்கேற்றனர். அதில் கபடி போட்டியில் 2-ம் இடமும், கைப்பந்து போட்டியில் 3-ம் இடமும் பிடித்தனர். 11-ம் வகுப்பு மாணவன் கவுதம் 800 மீட்டர் ஓட்டப்பந்தயத்தில் முதல் இடமும், 1500 மீட்டர் ஓட்டப்பந்தயத்தில் மூன்றாம் இடமும் பிடித்து வெற்றி பெற்றார். சிலம்பம் போட்டியில் 8-ம் வகுப்பு மாணவி ருத்ரா மூன்றாம் இடம் பிடித்தார். 11-ம் வகுப்பு மாற்றுத்திறனாள் மாணவன் தினேஷ் கார்த்திக் 100 மீட்டர் ஓட்டப்பந்தயத்தில் முதலிடமும், 50 மீட்டர் ஓட்ட பந்தயத்தில் 2-ம் இடமும் பிடித்தார். 7-ம் வகுப்பு மாணவி திவ்ய பிரபா 50 மீட்டர் ஓட்டப்பந்தயத்தில் முதலிடம் பிடித்து வெற்றி பெற்றார். கபடி போட்டியில் வெற்றி பெற்ற 12 மாணவர்களுக்கு தலா ரூ.2 ஆயிரம் வீதம் ரூ.24 ஆயிரமும், கைப்பந்து, ஓட்டப்பந்தயம் உள்ளிட்ட பல்வேறு போட்டிகளில் பங்கேற்ற மாணவர்களுக்கு ரூ.26 ஆயிரம் என மொத்தம் ரூ.50 ஆயிரம் மாணவர்களின் வங்கி கணக்கில் செலுத்தப்பட்டது.

பள்ளி தலைமை ஆசிரியர் டி.ஆறுமுகம் தலைமையில் மாணவர்களுக்கு பாராட்டு விழா நடைபெற்றது. உடற்கல்வி ஆசிரியர் மதன்குமார் உள்ளிட்ட ஆசிரியர்கள், பெற்றோர் ஆசிரியர் சங்கம் மற்றும் கல்வி மேலாண்மை குழு நிர்வாகிகள் கலந்து கொண்டு மாணவர்களை பாராட்டினர்.