குடிநீர் கேட்டு பொதுமக்கள் சாலை மறியல்

ராதாபுரம்:

ராதாபுரம் யூனியன் வேப்பிலான்குளம் பஞ்சாயத்துக்கு உட்பட்ட தெற்கு கும்பிளம்பாடு கிராமத்தில் கடந்த சில வாரங்களாகவே குடிநீர் சரிவர வினியோகம் செய்யப்படவில்லை என பொதுமக்கள் குற்றம் சாட்டி வந்தனர். இதுகுறித்து பஞ்சாயத்து அலுவலகத்தில் புகார் மனு அளித்தும் எந்தவித நடவடிக்கையும் எடுக்கவில்லை என கூறப்படுகிறது. இதனால் ஆத்திரமடைந்த கிராம மக்கள் நேற்று காலி குடங்களுடன் கும்பிளம்பாடு- பணகுடி சாலையில் மறியல் செய்தனர்.

தகவல் அறிந்ததும் ராதாபுரம் போலீசார் மற்றும் வட்டார வளர்ச்சி அலுவலர் விரைந்து வந்து போராட்டத்தில் ஈடுபட்டவர்களிடம் பேச்சுவார்த்தை நடத்தினர். விரைவில் குடிநீர் வழங்க நடவடிக்கை எடுக்கப்படும் என்று உறுதி அளித்தனர். இதனை தொடர்ந்து அவர்கள் போராட்டத்தை கைவிட்டு கலைந்து சென்றனர்.