புதுக்கோட்டை கீழராஜ வீதியில் புறக்காவல் நிலையம் திறப்பு

புறக்காவல் நிலையம் திறப்பு

தீபாவளி பண்டிகை வருகிற 24-ந் தேதி கொண்டாடப்படுகிறது. இதையொட்டி புதுக்கோட்டையில் பண்டிகைக்கான ஜவுளிகள், பட்டாசு உள்ளிட்ட பொருட்களை வாங்க பொதுமக்கள் கூட்டம் கீழராஜ வீதி, மேலராஜ வீதி, வடராஜ வீதி, தெற்கு ராஜ வீதி ஆகிய கடைவீதிகளில் அலைமோதுகிறது. பண்டிகைக்காக சாலையோர கடைகளும் ஆங்காங்கே போடப்பட்டுள்ளன. பொதுமக்கள் கூட்டம் அதிகமாக காணப்படுவதால் பாதுகாப்பு ஏற்பாடுகளை டவுன் போலீசார் மேற்கொண்டுள்ளனர்.

இந்தநிலையில், கீழராஜ வீதி அண்ணா சாலை அருகே புறக்காவல் நிலையம் அமைக்கப்பட்டு நேற்று திறக்கப்பட்டது. இதனை மாவட்ட போலீஸ் சூப்பிரண்டு வந்திதா பாண்டே ரிப்பன் வெட்டி திறந்து வைத்தார். 30 இடங்களில் புதிதாக கண்காணிப்பு கேமராக்கள் பொருத்தப்பட்டுள்ள நிலையில், அதில் பதிவாகும் காட்சிகளை இந்த புறக்காவல் நிலையத்தில் இருந்து போலீசார் பார்வையிட்டு நடவடிக்கை எடுத்து வருகின்றனர். இதில் பெரிய திரையில் தெரியும் காட்சிகளை போலீஸ் சூப்பிரண்டு வந்திதா பாண்டே பார்வையிட்டார்.

இரும்பு தடுப்புகள்

கீழ ராஜ வீதியில் பொதுமக்கள் கூட்ட நெரிசலை கட்டுப்படுத்தும் வகையில் சாலையில் நடுப்பகுதியில் இரும்பு தடுப்புகள் போடப்பட்டன. ஒரு வழி பாதை போல கடை வீதிக்குள் ஒரு புறமும் மக்கள் நடந்து செல்லவும், மறுபுறம் கடைவீதியில் இருந்து பொதுமக்கள் வெளியே நடந்து வருவதற்காகவும் அமைக்கப்பட்டுள்ளது. இருசக்கர வாகனங்கள், கார்கள் உள்ளிட்ட வாகனங்களுக்கு தடை விதிக்கப்பட்டுள்ளது. அண்ணா சிலை அருகேயும், பிருந்தாவன் பகுதியிலும் இரும்பு தடுப்புகள் அமைத்து பாதுகாப்பு ஏற்பாடுகள் செய்யப்பட்டுள்ளன. இதேபோல் பழைய பஸ் நிலையம் அருகே இரும்பு தடுப்புகள் அமைத்து போக்குவரத்து திருப்பி விடப்பட்டுள்ளன. பண்டிகையையொட்டி பொதுமக்கள் இருசக்கர வாகனங்கள், கார்களில் வருவதால் சாலையில் கடும் போக்குவரத்து நெருக்கடி காணப்படுகிறது.

100 போலீசார்

கூட்ட நெரிசலை பயன்படுத்தி மர்மநபர்கள் குற்றச்செயல்களில் ஈடுபடுவதை கண்காணிக்கவும், தடுக்கவும் பாதுகாப்பு பணியில் 100 போலீசார் ஈடுபடுத்தப்பட்டுள்ளனர். இது தவிர 4 இடங்களில் கண்காணிப்பு கோபுரங்கள் போடப்பட்டு அதில் இருந்து போலீசார் கண்காணித்து வருகின்றனர். முன்னதாக புறக்காவல் நிலையம் திறப்பு நிகழ்ச்சியில் டவுன் துணை போலீஸ் சூப்பிரண்டு ராகவி, இன்ஸ்பெக்டர் குருநாதன் உள்பட போலீசார் கலந்து கொண்டனர்.

பாதாள சாக்கடை கழிவுநீர்

இதற்கிடையில் புதுக்கோட்டையில் நேற்று முன்தினம் இரவு பெய்த மழையின் காரணமாக கீழ ராஜ வீதியில் பாதாள சாக்கடையில் அடைப்பு ஏற்பட்டது. இதனால் மழைநீரோடு கழிவு நீர் கலந்து சாலையில் ஓடியது. தொடர்ந்து நேற்று காலையும் ஓடிய நிலையில் பாதாள சாக்கடை அடைப்பை சரி செய்யும் பணியை நகராட்சி நிர்வாகத்தினர் மேற்கொண்டனர். கழிவு நீர் சாலையில் ஓடியதால் பொதுமக்கள் அவதி அடைந்தனர்.