புவி வெப்பமயமாதலை கட்டுப்படுத்த புதிய கண்டுபிடிப்பு - விஞ்ஞானிகள் சாதனை

காரைக்குடி,

காரைக்குடியில் உள்ள மத்திய மின் வேதியியல் ஆய்வகம் (சென்ட்ரல் எலக்ட்ரோகெமிக்கல் ரிசர்ச் இன்ஸ்டிடியூட்) டைரக்டர் டாக்டர் கலைச்செல்வி நிருபர்களுக்கு பேட்டியளித்தார். அப்போது அவர் கூறியதாவது;

காரைக்குடி மத்திய மின் வேதியியல் ஆய்வகத்தில் 75 ஆவது வருட நிறுவன நாள் வரும் ஜூலை 25 ஆம் தேதி கொண்டாடப்பட உள்ளது. இதற்காக குறைந்தது 5 புதிய தொழில்நுட்பங்களை நாட்டிற்கு அர்ப்பணிக்க வேண்டும் என்ற நோக்கத்துடன் செயல்பட்டோம்.

அதில் முதல் வெற்றியாக முக்கிய கண்டுபிடிப்பாக கார்பன் டை ஆக்சைடை உறிஞ்சக் கூடிய ஒரு திடப் பொருளை எங்களது விஞ்ஞானிகள் டாக்டர் ரவி பாபு , டாக்டர் ஸ்ரவந்தி, டாக்டர் சிவசண்முகம், டாக்டர் வாசுதேவன் ஆகியோர் இணைந்த குழுவினர் கண்டுபிடித்துள்ளனர்.

தொழில் நிறுவனங்களில் இருந்து வெளிவரும் கார்பன் டை ஆக்சைடு சாக்ஸ் -நாக்ஸ் என்ற கலவையில் வெளி வருகிறது. இதில் உள்ள சாக்ஸ் என்ற கார்பன்-டை-ஆக்சைடை மிகச் சரியாக பிரித்து மீண்டும் உபயோகப்படுத்தக் கூடிய வகையில் உருமாற்றம் செய்யும் ஒரு தொழில்நுட்பத்தை கண்டுபிடித்துள்ளோம்.

இந்திய அளவில் சென்ட்ரல் எலக்ட்ரோகெமிக்கல் ரிசர்ச் இன்ஸ்டிடியூட் தான் முதன்முறையாக திட நிலையில் கார்பன்-டை-ஆக்சைடை உறிஞ்சக் கூடிய தொழில்நுட்பத்தை கண்டுபிடித்துள்ளது. இந்தத் தொழில் நுட்பத்தை தொழில் நிறுவனங்களில் பயன்படுத்துவதன் மூலம் புவி வெப்பமயமாதல் கட்டுப்படுத்தப்படும் இவ்வாறு கூறினார் .