தாளவாடி அருகே மாட்டை அடித்து கொன்ற புலி

தாளவாடி அருகே உள்ள நெய்தாளபுரம் பகுதியை சேர்ந்தவர் பசப்பா (வயது47). இவர் ஆடு, மாடுகள் வளர்த்து வருகிறார். இவற்றை வனப்பகுதியையொட்டி உள்ள தனது விவசாய தோட்டத்தில் நேற்று காலை மேய்ச்சலுக்கு விட்டுவிட்டு வீட்டு்க்கு சென்றுவிட்டார். பின்னர் மாலையில் கால்நடைகளை ஓட்டிவர தோட்டத்துக்கு சென்றார். அப்போது அங்கு பசு மாடு ஒன்று குடல் சரிந்த நிலையில் இறந்து கிடந்தது. இதனால் அதிர்ச்சி அடைந்தார். உடனே அவர் இதுபற்றி தாளவாடி வனத்துறையினருக்கு தகவல் கொடுத்தார்.

அதைத்தொடர்ந்து வனத்துறையினர் அங்கு சென்று இறந்து கிடந்த மாட்டை பார்வையிட்டனர். அதன் அருகே பதிவாகியிருந்த கால்தடத்தை ஆய்வு செய்தனர். இதில் பதிவானது புலியின் கால்தடம் என்பது தெரியவந்தது. வனப்பகுதியில் இருந்து வந்த புலி மேய்ந்து கொண்டிருந்த மாட்டை அடித்து கொன்று பாதியை சாப்பிட்டுவிட்டு மீதியை அங்கேயே போட்டுவிட்டு் சென்றது தெரியவந்தது. இதனால் விவசாயிகள் பீதி அடைந்துள்ளனர்.