மாடு மீது மோட்டார் சைக்கிள் மோதல்; வாலிபர் பலி

காய்கறி கடை

புதுக்கோட்டை மாவட்டம், மணமேல்குடி அருகே கோபாலபட்டினம் பகுதியை சேர்ந்தவர் பாதுஷா (வயது 32). இவரது தம்பி முகம்மது ராவுத்தர் (30). இவர்கள் மணமேல்குடி பகுதியில் ஓட்டல் மற்றும் காய்கறி கடை நடத்தி வருகின்றனர். இந்நிலையில் நேற்று முன்தினம் இரவு வேலையை முடித்துவிட்டு கிழக்கு கடற்கரை சாலையில் கோபாலபட்டினம் நோக்கி மோட்டார் சைக்கிளில் சென்று கொண்டிருந்தனர்.

வாலிபர் பலி

அம்மாபட்டினம் அருகே வந்தபோது எதிர்பாராதவிதமாக சாலையில் குறுக்கே வந்த மாடு மீது மோட்டார் சைக்கிள் மோதியது. இதில் நிலை தடுமாறி இருவரும் கீழே விழுந்து படுகாயமடைந்தனர். இதில் முகம்மது ராவுத்தர் சம்பவ இடத்திலேயே பரிதாபமாக இறந்தார். படுகாயமடைந்த பாதுஷாவை அக்கம் பக்கத்தில் உள்ளவர்கள் மீட்டு சிகிச்சைக்காக மணமேல்குடி அரசு மருத்துவமனைக்கு அனுப்பி வைத்தனர்.

இதுகுறித்து தகவலறிந்த மணமேல்குடி போலீசார் சம்பவ இடத்திற்கு விரைந்து வந்து முகம்மது ராவுத்தர் உடலை கைப்பற்றி பிரேத பரிசோதனைக்காக மணமேல்குடி அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.