லாரி மீது மோட்டார் சைக்கிள் மோதல்; வாலிபர் படுகாயம்

ஆலங்குளம்:

நெல்லை பாளையங்கோட்டை ஜோதிபுரம் வடக்குதெருவை சேர்ந்தவர் தங்கராஜ் மகன் அருண் பிரகாஷ் (வயது 29). இவர் ஒரு கார் கம்பெனியில் மெக்கானிக்காக வேலை செய்து வருகிறார். நேற்று வாடிக்கையாளரின் கார் ஒன்றை பழுது பார்ப்பதற்காக சுரண்டை அருகே சேர்ந்தமரத்திற்கு மோட்டார் சைக்கிளில் அருண் பிரகாஷ் சென்றார். வேலை முடித்துவிட்டு மீண்டும் ஊருக்கு புறப்பட்டார்.

ஆலங்குளம் அடுத்த நல்லூர் விலக்கு அருகே வந்த போது, எதிர்பாராதவிதமாக மோட்டார் சைக்கிள், சாலையோரம் நின்ற லாரியின் பின்பக்கத்தில் மோதியது. இதில் தலையில் பலத்த காயம் அடைந்த அருண் பிரகாஷ் ரத்த வெள்ளத்தில் சரிந்து விழுந்தார்.

அந்த வழியாக சென்றவர்கள் அவரை மீட்டு சிகிச்சைக்காக பாளையங்கோட்டை அரசு ஆஸ்பத்திரிக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

இதுகுறித்து ஆலங்குளம் போலீசார் வழக்குப்பதிவு செய்து, லாரி டிரைவரான மாறாந்தையை சேர்ந்த வேலு பாஸ்கரனிடம் விசாரணை நடத்தி வருகிறார்கள்.