வேதாரண்யத்தில், 3-வது நாளாக மீனவர்கள் மீன்பிடிக்க செல்லவில்லை

வேதாரண்யம்:

குறைந்தகாற்றழுத்த தாழ்வு பகுதி உருவாகி உள்ளதால் வேதாரண்யத்தில் 3-வது நாளாக மீனவர்கள் மீன்பிடிக்க கடலுக்கு செல்லவில்லை.

மீன்வளத்துறை எச்சரிக்கை

நாகை மாவட்டம் வேதாரண்யத்தை அடுத்த கோடியக்கரை, ஆறுகாட்டுதுறை, புஷ்பவனம், வெள்ளபள்ளம், மணின்தீவு உள்ளிட்ட 10-க்கும் மேற்பட்ட மீனவ கிராமங்களில் 5 ஆயிரத்திற்கும் மேற்பட்ட மீனவர்கள் மீன்பிடி தொழிலில் ஈடுபட்டு வருகின்றனர்.

இந்த நிலையில் வங்கக்கடலில் குறைந்த காற்றழுத்த தாழ்வு பகுதி உருவாகி இருப்பதால் மீனவர்கள் மீன்பிடிக்க கடலுக்கு செல்ல வேண்டாம் என வானிலை மையம் அறிவித்துள்ளது. இந்த அறிவிப்பை தொடர்ந்து மீன்வளத்துறை கடந்த 8-ந் தேதி முதல் மறு அறிவிப்பு வரும் வரை மீனவர்கள் மீன்பிடிக்க செல்ல வேண்டாம் என எச்சரிக்கை விடுத்துள்ளது.

3-வது நாளாக மீன்பிடிக்க செல்லவில்லை

இதை தொடர்ந்து வேதாரண்யத்தை அடுத்த கோடியக்கரை, ஆறுகாட்டுதுறை, புஷ்பவனம், வெள்ளபள்ளம் உள்ளிட்ட பல்வேறு கிராமங்களை சேர்ந்த 5 ஆயிரத்துக்கும் மேற்பட்ட மீனவர்கள் நேற்று 3-வது நாளாக மீன்பிடிக்க செல்லவில்லை.

கடல் சீற்றமாக காணப்படுவதால் மீனவர்கள் தங்கள் படகுகள் மற்றும் மீன்பிடி வலைகளை கரையில் இருந்து சற்று தொலைவில் பாதுகாப்பாக வைத்துள்ளனர். கடந்த 3 நாட்களாக மீன்பிடிக்க செல்லாமல் மீனவர்கள் வீடுகளில் முடங்கி உள்ளனர். இதனால் கடற்கரை மற்றும் மீன் மார்கெட்கள் வெறிச்சோடி கிடந்தது.

கருவாடு விற்பனை மும்முரம்

வேதாரண்யம் பகுதியில் மீன் கிடைக்காததால் கருவாடு, நாட்டுக் கோழி, நாட்டு மீன்கள் விற்பனை மும்முரமாக நடைபெற்றது.