"தீர்ப்பை நினைத்து இரவெல்லாம் தூக்கமில்லை" "உதட்டில் தான் சிரிப்பு..உள்ளத்தில் இல்லை" - ஈபிஎஸ் உருக்கமான பேச்சு

மதுரை

முன்னாள் முதல்-அமைச்சர் ஜெயலலிதாவின் 75வது பிறந்தநாளை முன்னிட்டும்., அ.தி.மு.க.வின் 51வது பொன்விழா ஆண்டை முன்னிட்டும் 51 ஏழை எளிய ஜோடிகளுக்கு சமத்துவ சமுதாய திருமணமாக அம்மா பேரவை செயலாளர் ஆர்பி.உதயகுமார் ஏற்பாட்டில் நடைபெற்றது. இந்த விழாவில் 51 ஜோடிகளில் முன்னாள் அமைச்சர் ஆர்.பி.உதயாகுமரின் மகளும் ஒருவராவர்.

மதுரை மாவட்டம் திருமங்கலம் அருகே சுமார் 150 ஏக்கர் பரப்பளவில் பிரம்மாண்ட திருமண மேடை.மொய் எழுதுமிடம்., உணவு அருந்துமிடம் என அமைக்கப்பட்டு இருந்தது. விழாவிற்கு சேலத்திலிருந்து சாலைமார்கமாக எதிர்க்கட்சி தலைவர் எடப்பாடி பழனிச்சாமி வந்தார். அவர் மறைந்த முன்னாள் முதல்-அமைச்சர்கள் எம்ஜிஆர் மற்றும் ஜெயலலிதாவின் வெண்கல சிலைகளுக்கு மாலை அணிவித்து 51 ஜோடிகளுக்கு தாலி எடுத்துக்கொடுத்து திருமணத்தை தலைமையேற்று நடத்தி வைத்தார்.

திருமண விழா மேடையில் அனைவரும் பரபரப்பாக இருந்தனர். தலைவர்கள் மேடையில் இருக்கும்போதே சுப்ரீம் கோர்ட்டு தீர்ப்பு எடப்பாடி பழனிசாமிக்கு சாதகமாக வந்ததால், ஈபிஎஸ் உள்ளிட்ட அனைவரும் உற்சாகமடைந்தனர்.

அதிமுக பொதுக்குழு செல்லும் என சுப்ரீம் கோர்ட்டு தீர்ப்பு வழங்கியிருப்பதற்கு ஆர்.பி.உதயகுமார் எடப்பாடி பழனிசாமிக்கு வாழ்த்து தெரிவித்தார். மேலும், சுப்ரீம் கோர்ட்டு தீர்ப்பு குறித்து முன்னாள் அமைச்சர் ஆர்.பி. உதயகுமார் விழா மேடையில் உணர்ச்சிவசப்பட்டு பேசினார்.

இந்த திருமண விழா மேடையில் ஆர்பி உதயகுமார் பேசுகையில், "இந்த திருமண விழா மேடைக்கு வரும்போது அனைவரும் மவுனமாக இருந்தோம். எடப்பாடியார் மேடைக்கு வரும்போது பின்னணியில் மக்களின் முதல்வர் என்ற பாட்டு ஒலித்தது. அந்த பின்னணியில் அவர் நடந்து வருவதை பார்க்கும்போது அழகர் நடந்து வருவது மாதிரி இருந்தது. அதனை உண்மை என்று மெய்ப்பித்துள்ளது சுப்ரீம் கோர்ட்டு தீர்ப்பு. அம்மா நம்மோடு இருக்கிறார் என்பதற்கு சாட்சியாக, தெய்வ வாக்காக சுப்ரீம் கோர்ட்டு தீர்ப்பு வந்துள்ளது.

அம்மாவை வேண்டி நின்ற எங்களுக்கு இந்த தீர்ப்பு உற்சாகத்தை அளித்துள்ளது. சுப்ரீம் கோர்ட்டின் தீர்ப்பைத் தொடர்ந்து தமிழ்நாட்டு மக்களும் எடப்பாடியார் தான் முதல்வர் என்கிற தீர்ப்பினை விரைவில் அளிப்பார்கள். அதன் முதல் வெற்றியாக ஈரோடு இடைத்தேர்தல் அமையும்.

முதல்வர் ஸ்டாலின் எங்கள் தலைவர் எடப்பாடியாருக்கு எத்தனை நெருக்கடி கொடுத்தாலும் சிம்ம சொப்பனமாக இருக்கிறார். சூப்ரீம் கோர்ட்டு தெளிவான தீர்ப்புக்கு மத்தியில் 51 ஜோடிகளுக்கு திருமணத்தை நடத்தி வைத்து இதனை வரலாற்றுச் சிறப்புமிக்க நிகழ்வாக எடப்பாடி பழனிசாமி மாற்றியுள்ளார்" எனப் புகழ்ந்து பேசினார் ஆர்பி உதயகுமார்.

நிகழ்ச்சியில் முன்னாள் அமைச்சர்கள் கடம்பூர் ராஜு.ராஜேந்திர பாலாஜி,செல்லூர் ராஜு,அதிமுக அவை தலைவர் தமிழ்மகன் உசேன் எம்.எல்.ஏ. ராஜன் செல்லப்பா மற்றும் அ.தி.மு.க. மூத்த நிர்வாகிகள் மாவட்ட செயலாளர்கள்., உள்ளிட்ட முக்கிய நிர்வாகிகள் ஏராளமானவர் கலந்து கொண்டனர்.

இந்த திருமண நிகழ்வில் குறைந்தபட்சம் 50,000 பேர் கலந்து கொள்வதற்கான ஏற்பாடுகள் செய்யப்பட்டு இருந்தன. உணவு அருந்துவதற்கு 6 இடங்களில் ஏற்பாடு செய்யப்பட்டு தொடர்ந்து காலை 7.00 மணி முதல் பந்தி பரிமாறப்பட்டது.

அதே போல் மொய்-டெக் என்ற பெயரில் 102 கணினி மற்றும் பணம் என்னும் இயந்திரத்துடன் மொய் எழுதும் பணியில் பணியாளர்கள் ஈடுபட்டனர்.

ஆயிரத்திற்கு மேற்பட்ட சுற்றுவட்டார கிராம பொதுமக்கள்., தொண்டர்கள்., நிர்வாகிகள் என ஏராளமானோர் பங்கேற்று இந்த திருமண விழா நடைபெற்றது. புதிதாக திருமணமான 51 ஜோடிகளுக்கும் கல்யாண சீர்வரிசையாக 1லட்சம் மதிப்பிலான கட்டில்., பீரோ., பாத்திரங்கள் ஆகியவற்றை வழங்கப்பட்டது.