பள்ளி வாகனம் மோதி லாரி டிரைவர் பலி

எருமப்பட்டி

எருமப்பட்டி அருகே உள்ள போடிநாயக்கன்பட்டியைச் சேர்ந்தவர் பொன்னுசாமி (வயது 41). இவர் லாரி டிரைவர். இவர் அலங்கானத்தில் இருந்து போடிநாயக்கன்பட்டிக்கு தனது மோட்டார் சைக்கிளில் சென்று கொண்டிருந்தார். அப்போது பெட்ரோல் பங்க் அருகே எதிரே வந்த நாமக்கல் தனியார் பள்ளி பஸ் அவரது மோட்டார் சைக்கிள் மீது எதிர்பாராதவிதமாக மோதியது. இதில் பொன்னுசாமி தூக்கி வீசப்பட்டு படுகாயம் அடைந்தார். பின்னர் அந்தவழியாக வந்தவர்கள் அவரை மீட்டு நாமக்கல் அரசு மருத்துவமனைக்கு சிகிச்சைக்காக அனுப்பி வைத்தனர். அங்கு பரிசோதனை செய்த டாக்டர்கள் அவர் வரும் வழியிலேயே இறந்து விட்டதாக தெரிவித்தனர். இதுகுறித்து அவரது மனைவி கவிதா எருமப்பட்டி போலீசில் புகார் கொடுத்தார். இதன் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.