இளம்பெண் கழுத்தை நெரித்து கொலை

தென்காசியில் இளம்பெண் நடத்தையில் சந்தேகத்தால் கழுத்தை நெரித்து கொலை செய்யப்பட்டார். இந்த வெறிச்செயலில் ஈடுபட்ட கணவரை போலீசார் கைது செய்தனர்.

கூலி தொழிலாளி

தென்காசி ஆசாத் நகர் பகுதியைச் சேர்ந்தவர் முத்துராஜ் (வயது 36). இவருடைய மனைவி மகாதேவி (28). கூலி தொழிலாளர்களான இவர்களுக்கு ஒரு மகனும், ஒரு மகளும் உள்ளனர்.

இந்த நிலையில் முத்துராஜ், மனைவி மகாதேவியின் நடத்தையில் சந்தேகப்பட்டு அவரிடம் அடிக்கடி தகராறு செய்து வந்தார்.

கழுத்தை நெரித்து கொலை

கடந்த 2-ந்தேதி இரவில் கணவன்-மனைவிக்கு இடையே மீண்டும் தகராறு ஏற்பட்டது. அப்போது ஆத்திரமடைந்த முத்துராஜ், மனைவி என்றும் பாராமல் மகாதேவியின் கழுத்தை கைகளால் பலமாக நெரித்தார்.

இதில் மூச்சுத்திணறி நிலைகுலைந்த மகாதேவி சம்பவ இடத்திலேயே பரிதாபமாக இறந்தார். இதையடுத்து அங்கிருந்து முத்துராஜ் தப்பி சென்று விட்டார். இதற்கிடையே, அலறல் சத்தம் கேட்டு அக்கம்பக்கத்தினர் அங்கு வந்து பார்த்தபோது மகாதேவி இறந்து கிடந்தது தெரியவந்தது.

கணவர் கைது

இதுகுறித்து குற்றாலம் போலீஸ் நிலையத்துக்கு தகவல் தெரிவிக்கப்பட்டது. உடனே போலீசார் சம்பவ இடத்துக்கு விரைந்து சென்றனர். இறந்த மகாதேவியின் உடலைக் கைப்பற்றி பிரேத பரிசோதனைக்காக தென்காசி அரசு ஆஸ்பத்திரிக்கு அனுப்பி வைத்தனர். மேலும் இதுகுறித்து வழக்குப்பதிவு செய்து முத்துராஜை பிடித்து கைது செய்தனர்.

தென்காசியில் நடத்தையில் சந்தேகத்தால் இளம்பெண்ணை கழுத்தை நெரித்து கணவரே கொலை செய்த பயங்கர சம்பவம் பெரும் பரபரப்பை ஏற்படுத்தியது.