பென்னிகுயிக் சிலைக்கு விவசாயிகள் மாலை அணிவித்து மரியாதை

தென்தமிழகத்தின் குடிநீர் தேவையை பூர்த்தி செய்யும் வகையில், கர்னல் ஜான் பென்னிகுயிக் 152 அடி உயரம் கொண்ட முல்லைப்பெரியாறு அணையை கட்டினார். இந்த அணையில் இருந்து முதன்முதலாக கடந்த 1895-ம் ஆண்டு அக்டோபர் மாதம் 10-ந்தேதி தமிழகத்திற்கு தண்ணீர் திறந்து விடப்பட்டது. இந்த அணை தேனி, திண்டுக்கல், மதுரை, சிவகங்கை, ராமநாதபுரம் ஆகிய 5 மாவட்டங்களின் நீர் ஆதாரமாக விளங்குகிறது. இந்நிலையில் அணையில் இருந்து தமிழகத்திற்கு தண்ணீர் திறக்கப்பட்டு இன்றுடன் 126 ஆண்டுகள் நிறைவடைந்தது. 127-வது ஆண்டு பிறந்ததையொட்டி அதை கொண்டாடும் வகையில் கூடலூர் அருகே லோயர்கேம்பில் பென்னிகுயிக் மணிமண்டபத்தில் உள்ள அவரது சிலைக்கு 5 மாவட்ட விவசாய சங்கம் சார்பில் மாலை அணிவித்து மரியாதை செலுத்தப்பட்டது.

அதன்படி பாரதீய கிஷான் சங்கம், முல்லைச்சாரல் விவசாயிகள் சங்கம், இயற்கை வேளாண் விவசாயிகள் சங்கம், 18-ம் கால்வாய் விவசாயிகள் சங்கம், பெரியார்- வைகை பாசன விவசாயிகள் சங்கம் சார்பில் மரியாதை செலுத்தினர். மேலும் ஏரானமான பெண்களும் மாலை அணிவித்து மரியாதை செலுத்தினர். இதையடுத்து குருவனூற்று பாலம் அருகே முல்லைப்பெரியாற்று தண்ணீரில் விவசாயிகள் மலர் தூவி வணங்கினர்.