மாமல்லபுரத்தில் சாலையோரம் குவியலாக வீசப்பட்ட காலாவதியான மிட்டாய் பாக்கெட்டுகள்; உணவு பாதுகாப்பு துறை அதிகாரிகள் விசாரணை

மாமல்லபுரம்,

மிட்டாய் பாக்கெட்டுகள்

செங்கல்பட்டு மாவட்டம் மாமல்லபுரத்தில் வருகிற 28-ந் தேதி சர்வதேச 44-வது செஸ் ஒலிம்பியாட் போட்டி தொடங்கி அடுத்த மாதம் 10-ந்தேதி வரை நடக்கிறது. இதையொட்டி மாமல்லபுரம் பகுதியில் உள்ள அனைத்து தெருக்களிலும், முக்கிய புராதன மையங்களிலும் கண்காணிப்பு தீவிரப்படுத்தப்பட்டுள்ளது.

இந்த நிலையில் மாமல்லபுரம் ஐந்துரதம் அருகே உள்ள வெண்புருஷம் சாலையோரத்தில் நேற்று காலை ஏராளமான மிட்டாய் பாக்கெட்டுகள் குவியல், குவியலாக வீசப்பட்டு கிடந்தன.

அப்போது அந்த வழியாக நடைபயி்ற்சிக்கு சென்ற சிலர் அதுகுறித்து கொடுத்த தகவலின்பேரில் உணவு பாதுகாப்பு துறை அதிகாரிகள் அந்த பகுதிக்கு விரைந்து சென்று காலாவதியான இனிப்பு மிட்டாய் பாக்கெட்டுகளை கைப்பற்றி விசாரணை நடத்தினர். இதில் காலாவதியான கடலை மிட்டாய், எள்ளு மிட்டாய் பாக்கெட்டுகள் அதிக அளவில் வீசப்பட்டு இருந்ததை கண்டுபிடித்தனர்.

அதிகாரிகளின் சோதனைக்கு பயந்து...

மாமல்லபுரத்தில் இருந்து கொண்டு வந்து வெண்புருஷம் சாலையில் அதனை கொட்டிய கடைக்காரர் யார்? என்பது குறித்து உணவு பாதுகாப்பு துறை அதிகாரிகள் தீவிர விசாரணை நடத்தி வருகிறார்கள். கடந்த சில நாட்களாக மாமல்லபுரம் பகுதியில் கடைகளில் விற்கப்படும் உணவு பொருட்களின் தரம் குறித்து அதிகாரிகள் தீவிரமாக கண்காணித்து சோதனை நடத்தி வருகிறார்கள்.

இதில் அதிகாரிகளின் சோதனைக்கு பயந்து வியாபாரிகள் கடைகளில் இருந்த காலாவதியான மிட்டாய் பாக்கெட்டுகளை அள்ளி வந்து இங்கு சாலையோரம் வீசிவிட்டு சென்று இருக்கலாம் என்று தெரிவித்த உணவு பாதுகாப்பு துறை அதிகாரிகள் இதுகுறித்து விசாரித்து வருவதாக தெரிவித்தனர்.