முதல்-அமைச்சர் மு.க.ஸ்டாலினுக்கு உற்சாக வரவேற்பு

கோவை

கோவையில் முதல்-அமைச்சர் மு.க.ஸ்டாலினுக்கு, தொண்டர்கள் உற்சாகமாக வரவேற்பு அளித்தனர்.

முதல்-அமைச்சர் வருகை

திருப்பூரில் தி.மு.க. பிரமுகர் இல்ல திருமண வரவேற்பு நிகழ்ச்சியில் பங்கேற்பதற்காக முதல்-அமைச்சர் மு.க.ஸ்டாலின் சென்னையில் இருந்து விமானம் மூலம் நேற்று மதியம் 1.30 மணியளவில் கோவை வந்து இறங்கினார். அப்போது அவரை அழைத்து வருவதற்காக விமான நிலையத்துக்குள் உள்ள சிறப்பு பாதையில் கார் தயாராக நின்றது. ஆனால் முதல்-அமைச்சர் மு‌க.ஸ்டாலின் காரில் ஏறாமல் விமான நிலையத்துக்கு வெளியே சிறிது தூரம் நடந்தே வந்தார். அவருக்கு அங்கு போலீசாரின் அணிவகுப்பு மரியாதை அளிக்கப்பட்டது. அதை ஏற்றுக்கொண்ட அவர், அங்கு திரண்டு இருந்த பொதுமக்கள் மற்றும் தொண்டர்களை நடந்தே சென்று சந்தித்தார்.

வரவேற்பு

பின்னர் முதல்-அமைச்சர் மு.க.ஸ்டாலின் அங்கிருந்து காரில் புறப்பட்டு அவினாசி சாலையில் உள்ள தனியார் ஓட்டலுக்கு சென்றார். அங்கு மதிய உணவு அருந்திவிட்டு ஓய்வு எடுத்தார். முன்னதாக கோவை விமான நிலையத்தில் இருந்து தனியார் ஓட்டல் செல்லும் சாலை நெடுகிலும் முதல்-அமைச்சர் மு.க.ஸ்டாலினுக்கு தொண்டர்கள் உற்சாக வரவேற்பு அளித்தனர்.

முன்னதாக விமான நிலையத்தில் அமைச்சர்கள் செந்தில்பாலாஜி, பெரிய கருப்பன், முத்துசாமி, மு.பெ.சாமிநாதன், கயல்விழி, கோவை மாவட்ட கலெக்டர் சமீரன், மாநகராட்சி மேயர் கல்பனா உள்ளிட்டோர் வரவேற்றனர்.

உதயநிதி ஸ்டாலின் எம்.எல்.ஏ.

இதில் முன்னாள் அமைச்சர் பொங்கலூர் பழனிச்சாமி, மாவட்ட செயலாளர்கள் முன்னாள் எம்.எல்.ஏ. நா.கார்த்திக், தொ.அ.ரவி, தளபதி முருகேசன், முன்னாள் எம்.பி. ஏ.பி.நாகராஜ், அமைப்பு சாரா ஓட்டுனர் அணி மாநில துணை செயலாளரும், முன்னாள் எம்.எல்.ஏ.வுமான பனப்பட்டி தினகரன் உள்பட பலர் கலந்து கொண்டனர்.

பின்னர் மாலை 5 மணியளவில் முதல்-அமைச்சர் மு.க.ஸ்டாலின் தனியார் ஓட்டலில் இருந்து காரில் புறப்பட்டு சாலை மார்க்கமாக திருப்பூர் சென்றார்.பின்னர் நிகழ்ச்சி முடிந்து அவர் இரவு 9.15 மணிக்கு கோவையில் இருந்து தனி விமானம் மூலம் சென்னை திரும்பினார். முன்னதாக நேற்று மதியம் 2.30 மணியளவில் விமான மூலம் கோவை வந்த உதயநிதி ஸ்டாலின் எம்.எல்.ஏ.வுக்கு தொண்டர்கள் உற்சாக வரவேற்பு அளித்தனர்.