ஆழியாறு அணையில் பேரிடர் ஒத்திகை பயிற்சி

பொள்ளாச்சி,

கோவை அருகே தொப்பம்பட்டியில் மத்திய ரிசர்வ் போலீஸ் படை (சி.ஆர்.பி.எப்.) பயிற்சி கல்லூரி உள்ளது. இங்கு பயிற்சியின் ஒரு பகுதியாக பொள்ளாச்சி அருகே ஆழியாறு அணையில் பேரிடர் மீட்பு ஒத்திகை பயிற்சி நேற்று அளிக்கப்பட்டது. பயிற்சி கல்லூரி ஐ.ஜி. ஸ்ரீசத்தீஷ் சந்திர வர்மா உத்தரவின் பேரில் கமாண்டோ ராஜேஸ்குமார், துணை கமாண்டோ அனஷ் ஆகியோர் தலைமையில் 80 வீரர்களுக்கு பல்வேறு கட்ட பயிற்சிகள் அளிக்கப்பட்டது. இன்ஸ்பெக்டர்கள் பிரபு, வி.கே.கோஸ் உள்பட 8 பேர் கொண்ட அதிகாரிகள் பயிற்சி அளித்தனர். நிலநடுக்கம், மழை, வெள்ள காலங்களில் பொதுமக்களை எப்படி? மீட்பது குறித்து பயிற்சி அளிக்கப்பட்டது.

மேலும் டிரம்ப், கேன் மற்றும் மரத்துண்டுகளை கொண்டு உருவாக்கப்பட்ட படகில் அணையின் மைய பகுதிக்கு சென்று, அங்கு நீரில் தத்தளிக்கும் ஒருவரை மீட்டு, கரைக்கு வருவது போன்று செயல்விளக்கம் அளித்தனர். இதுகுறித்து சி.ஆர்.பி.எப். அதிகாரிகள் கூறுகையில், மத்திய ரிசர்வ் படையில் அதிவிரைவுப்படை பிரிவு வீரர்களுக்கு பேரிடர் காலங்களில் கையில் கிடைத்த பொருட்களை கொண்டு செயற்கையாக உருவாக்கப்பட்ட படகு மற்றும் ரப்பர் படகு மூலம் சென்று மீட்பு பணியில் ஈடுபடுவது குறித்து பயிற்சி அளிக்கப்பட்டது என்றனர்.