தென் மண்டல அளவில் சிறப்பான காவல் நிலையமாக திண்டுக்கல் தாலுகா காவல் நிலையம் தேர்வு

திண்டுக்கல்:

தென் மண்டல அளவில் சிறப்பாகச் செயல்படும் காவல் நிலையங்களை அங்கீகரிக்க ஒவ்வோர் ஆண்டும் பல குழுக்கள் அமைக்கப்படுகிறது.

அந்தக் குழுக்கள் காவல் நிலையங்களுக்குச் சென்று காவல் நிலையத்தின் பராமரிப்பு, சுற்றுப்புறச் சூழல், மனுதாரர்களிடம் காவலர்கள் நடந்துகொள்ளும் அணுமுறை, வழக்கு விசாரணைகளில் தண்டனை பெற்றுத் தரும் விவரம், நிலுவையில் உள்ள வழக்குகளை முடித்த விவரம், வழக்கு விவரங்களை ஆன்லைனில் அப்டேட் செய்வது ஆகியவற்றை ஆய்வுசெய்கின்றன. மேலும், அந்தக் காவல் நிலையங்களைத் தொடர்ந்து கண்காணித்து, சிறந்த காவல் நிலையத்தைத் தேர்ந்தெடுக்கின்றன.

அதன்படி 2021 ஆண்டுக்காக தென் மண்டலத்தில் உள்ள காவல் நிலையங்களை ஆய்வு செய்ததில் திண்டுக்கல் தாலுகா காவல் நிலையம் தென்மண்டல அளவில் சிறந்த காவல் நிலையமாகத் தேர்ந்தெடுக்கப்பட்டது. இதனால் திண்டுக்கல் காவல்துறையினர் பெரும் மகிழ்ச்சி அடைந்துள்ளனர்.

இதுகுறித்து திண்டுக்கல் தாலுகா போலீஸ் நிலைய இன்ஸ்பெக்டர் பாலாண்டி கூறும்போது,

நாங்கள் காவல்துறை உயரதிகாரிகளின் வழிகாட்டுதல் படி எங்கள் காவல் நிலைய கடமைகளை விரைந்து முடித்து வருகிறோம். மேலும் காவலர்கள் உண்மையான உணர்வுடன் பொதுமக்களிடையே கண்ணியமான முறையில் நடந்து கொள்கின்றனர். விருது பெற வேண்டும் என்ற நோக்கத்தில் செயல்படவில்லை. மக்களுக்கு சேவையாற்ற வேண்டும் என்ற நோக்கத்தில் பணியாற்றினோம். தற்போது தென் மண்டல அளவில் சிறந்த காவல் நிலையமாகத் தேர்ந்தெடுக்கப்பட்டுள்ளது. இது எங்களுக்குப் பெரும் மகிழ்ச்சியை ஏற்படுத்தியுள்ளது என்றார்.