கந்துவட்டி கொடுமையால் பாதிப்பு:தம்பதி மீது ஆசிரியர் போலீசில் புகார்

தர்மபுரி வி. ஜெட்டிஅள்ளியை சேர்ந்தவர் ஸ்ரீதரன் (வயது54), தனியார் பள்ளி ஆசிரியர். இவர் நேற்று தர்மபுரி டவுன் போலீஸ் நிலையத்தில் ஒரு புகார் மனு கொடுத்தார். அந்த புகார் மனுவில் கூறப்பட்டுள்ளதாவது:-

தர்மபுரியில் உள்ள ஒரு தனியார் பள்ளியில் பணிபுரிந்து வருகிறேன். தர்மபுரியை சேர்ந்த தம்பதிகளிடம் கடந்த 1-10-2020 முதல் 23-7-2022 வரை பல தவணைகளாக ரூ.39 லட்சம் வட்டிக்கு கடன் வாங்கினேன். அந்த தொகைக்கு வட்டியுடன் சேர்த்து மொத்தம் ரூ.37 லட்சத்து 68 ஆயிரத்தை கொடுத்துள்ளேன். கடன் வாங்கியதற்கு ஈடாக கையொப்பமிட்ட பூர்த்தி செய்யப்படாத தேதி குறிப்பிடாத 8 காசோலைகளை மற்றும் வெற்று பத்திரங்கள் எனது பெயரில் உள்ள அசல் நில பத்திரம் ஆகியவற்றை கடன் கொடு்த்த நபர்கள் பறித்து கொண்டனர். கடந்த 25-8-2023 அன்று கடன் தொகையில் ஏற்கனவே செலுத்திய தொகை போக மீதி தொகையை செலுத்துகிறேன் என அவர்களிடம் கூறியதற்கு, நான் செலுத்திய தொகை வட்டிக்கே சரியாகி விட்டது, வாங்கிய கடனுக்கு 4 ரூபாய் வட்டி தர வேண்டும், தவறும் பட்சத்தில் நாள் ஒன்றிற்கு மீட்டர் வட்டியாக தரவேண்டும் என்றும், குடும்பத்தையே கொலை செய்து விடுவதாக கூறுகின்றனர். எனவே சம்பந்தப்பட்ட நபர்கள் மீது நடவடிக்கை எடுக்க வேண்டும்.

இவ்வாறு அந்த மனுவில் கூறப்பட்டுள்ளது.