துளிர் வினாடி-வினா போட்டி

முதுகுளத்தூர்,

முதுகுளத்தூர் காமராஜர் மெட்ரிக் மேல்நிலைப் பள்ளியில் தமிழ்நாடு அறிவியல் இயக்கத்தின் சார்பில் துளிர் வினாடி வினா போட்டி நடைபெற்றது. இதில் பேரூராட்சி துணைத் தலைவர் வயண பெருமாள் தலைமை வகித்தார். அறிவியல் இயக்க மாவட்ட தலைவர் அய்யாசாமி, துணைத்தலைவர் நவநீதகிருஷ்ணன், நல்லாசிரியர்கள் துரைப்பாண்டியன், தமயந்தி, பள்ளி மேலாளர் ரவி, பொருளாளர் முத்து ஆகியோர் முன்னிலை வகித்தனர். முதல்வர் அன்புக்கனி மோசஸ் வரவேற்றார். போட்டியில் 10-க்கும் மேற்பட்ட பள்ளி மாணவர்கள் கலந்து கொண்டனர். ஜூனியர் போட்டியில் முதல் இடத்தை செல்வநாயகபுரம் அரசு மேல்நிலைப்பள்ளி மாணவர்களும், சீனியர் போட்டியில் முதலிடத்தை விளங்களத்தூர் அரசு பள்ளி மாணவர்களும், சூப்பர் சீனியர் போட்டியில் முதல் இடத்தை முதுகுளத்தூர் பள்ளிவாசல் மேல்நிலைப்பள்ளி மாணவர்களும் பெற்றனர். 3 பிரிவிலும் முதலிடம் பெற்ற பள்ளி மாணவர்கள் வருகிற 20-ந் தேதி மாவட்ட அளவில் நடைபெற உள்ள போட்டியில் பங்கேற்க உள்ளனர். போட்டியில் பங்குபெற்ற அனைத்து பள்ளி மாணவர்களுக்கும் சான்றிதழ்கள், பரிசுகள் வழங்கப்பட்டன. முடிவில் பள்ளி ஆசிரியர் ரேகா நன்றி கூறினார்.