இந்திய கம்யூனிஸ்டு கட்சியினர் போராட்டம்

அரியலூர் மாவட்டம், தா.பழூரில் தபால் நிலையம் முன்பு இந்திய கம்யூனிஸ்டு கட்சியினர் மறியலில் ஈடுபட முயன்றனர். முன்னதாக அவர்கள் சுத்தமல்லி பிரிவு சாலையில் இருந்து தபால் நிலையம் நோக்கி மத்திய அரசுக்கு எதிராக கோஷங்களை எழுப்பியவாறு ஊர்வலமாக சென்றனர். போராட்டத்திற்கு ஒன்றிய செயலாளர் சக்கரவர்த்தி தலைமை தாங்கினார். மாவட்ட குழு பொறுப்பாளர் அபிமன்னன் முன்னிலை வகித்தார். மாவட்ட செயலாளர் ராமநாதன் மறியல் போராட்டத்தை தொடங்கி வைத்தார்.

முன்னாள் மாவட்ட செயலாளர் உலகநாதன் போராட்டம் குறித்து விளக்கி பேசினார். பின்னர் ஊர்வலமாக சென்ற இந்திய கம்யூனிஸ்டு கட்சியினர் தபால் நிலையம் முன்பு மறியலில் ஈடுபட முயன்றனர். இதையடுத்து அந்த கட்சியை சேர்ந்த 8 பெண்கள் உள்பட 44 பேரை தா.பழூர் போலீசார் கைது செய்தனர். பின்னர் மாலையில் அவர்கள் விடுவிக்கப்பட்டனர்.