மோட்டார் சைக்கிள்கள் மோதல்; வாலிபர் பலி

வாலிபர் பலி

விராலிமலை தாலுகா ராஜகிரி கிராமத்தை சேர்ந்தவர் ராஜ்குமார் (வயது 45). இவரது மகன்கள் கோபாலகிருஷ்ணன் (11), திவாகர் (9). இவர்கள் 3 பேரும் மோட்டார் சைக்கிளில் விராலிமலை- கீரனூர் சாலையில் சென்று கொண்டிருந்தனர். அப்போது அங்குள்ள ஒரு தனியார் மருத்துவமனை அருகே சென்றபோது எதிரே முல்லையூரை சேர்ந்த அய்யாக்கண்ணு மகன் பால்ராஜ் (21) என்பவர் ஓட்டி வந்த மோட்டார் சைக்கிள் எதிர்பாராதவிதமாக ராஜ்குமார் ஓட்டி வந்த மோட்டார் சைக்கிள் மீது மோதியது. இதில் பால்ராஜ் சம்பவ இடத்திலேயே பரிதாபமாக உயிரிழந்தார். மேலும் 3 பேர் காயமடைந்தனர்.

தந்தை-மகன்கள் காயம்

தகவல் அறிந்த விராலிமலை போலீசார் சம்பவ இடத்திற்கு விரைந்து வந்து காயமடைந்த ராஜ்குமார், திவாகர், கோபாலகிருஷ்ணன் ஆகிய 3 பேரையும் மீட்டு சிகிச்சைக்காக மணப்பாறையில் உள்ள ஒரு தனியார் மருத்துவமனைக்கு அனுப்பி வைத்தனர்.

இதற்கிடையே பால்ராஜின் உடலை மீட்டு பிரேத பரிசோதனைக்காக மணப்பாறை அரசு மருத்துவமனைக்கு அனுப்பி வைத்தனர். இதுகுறித்து விராலிமலை போலீசார் வழக்குப்பதிவு செய்து விசாரணை நடத்தி வருகின்றனர்.