கிறிஸ்தவர்கள் ஆர்ப்பாட்டம்

திண்டுக்கல் மேற்கு மரியநாதபுரம் புனித விண்ணேற்பு அன்னை ஆலயம் முன்பு கிறிஸ்தவர்கள் ஆர்ப்பாட்டம் செய்தனர். மணிப்பூர் மாநிலத்தில் கடந்த 2 மாதங்களாக இன கலவரம் நடைபெற்று வருகிறது. இதில் ஒரு தரப்பினத்தைச் சேர்ந்த பெண்கள் பாலியல் வன்கொடுமை செய்யப்பட்டு படுகொலை செய்யப்பட்டுள்ளனர். இந்த சம்பவத்தை கண்டித்தும் இதுகுறித்து உரிய நடவடிக்கை எடுக்காத மணிப்பூர் மாநில பா.ஜ.க. அரசை டிஸ்மிஸ் செய்ய வேண்டும். இனப்படுகொலைக்கு காரணமான நபர்களை கைது செய்ய வேண்டும் என வலியுறுத்தி ஆர்ப்பாட்டம் நடந்தது. ஆர்ப்பாட்டத்துக்கு பங்குத்தந்தை ஜெயசீலன் தலைமை தாங்கினார். இதில் பெண்கள் உட்பட 300-க்கும் மேற்பட்டோர் பங்கேற்று மணிப்பூர் இனப்படுகொலை சம்பவத்தை கண்டித்து கோஷங்கள் எழுப்பினர். முன்னதாக மணிப்பூரில் அமைதிநிலை திரும்பவேண்டி சிறப்பு பிரார்த்தனை செய்யப்பட்டது. இதில் ஊர் நிர்வாகிகள், பொதுமக்கள் ஏராளமானோர் கலந்துகொண்டனர்.