மாரியம்மன் கோவிலில் தேரோட்டம்

ஆத்தூர்:-

ஆத்தூர் அருகே உள்ள கீரிப்பட்டி பேரூராட்சியில் ஸ்ரீமாரியம்மன், எல்லையம்மன் கோவில் தேர்த்திருவிழா கடந்த 23-ந் தேதி பூச்சாட்டுதல் நிகழ்ச்சியுடன் தொடங்கியது. தொடர்ந்து மாரியம்மன் கோவிலில் கம்பம் நடுதல், பொங்கல் வைத்தல் போன்றவை நடந்தன. திருவிழாவின் முக்கிய நிகழ்ச்சியான தேரோட்டம் நடைபெற்றது. தேரில் அமர்ந்து யாரும் வரக்கூடாது என்று கோர்ட்டு உத்தரவிட்டு இருந்ததால், 5 வயது சிறுவனை தேரில் அமர வைத்து இருந்தனர். தேரை ஆத்தூர் உதவி கலெக்டர் சரண்யா, போலீஸ் துணை சூப்பிண்டு ராமச்சந்திரன், கோவில் செயல் அலுவலர் சோழமாதேவி மற்றும் திரளான பக்தர்கள் தேரை வடம்பிடித்து இழுத்தனர். தொடர்ந்து பக்தர்களுக்கு பிரசாதம் வழங்கப்பட்டது.