நகை மதிப்பீட்டாளரை தாக்கிய 4 பேர் மீது வழக்கு

விக்கிரமங்கலம்:

அரியலூர் மாவட்டம், விக்கிரமங்கலம் அருகே உள்ள கீழநத்தம் மேலத்தெருவை சேர்ந்தவர் கார்த்திக்(வயது 29). இவர் ஒரு தனியார் வங்கியில் நகை மதிப்பீட்டாளராக வேலை பார்த்து வருகிறார். இவருக்கும், அதே பகுதியை சேர்ந்த பாக்கியராஜுக்கும்(38) இடையே முன்விரோதம் இருந்து வந்தது. இந்நிலையில் கார்த்திக் தனது சொந்த வேலையின் காரணமாக, அரியலூர் சென்று விட்டு மோட்டார் சைக்கிளில் கீழநத்தம் நோக்கி திரும்பி வந்து கொண்டிருந்தார்.

வி.கைகாட்டி அருகே வந்தபோது அந்த வழியாக வந்த பாக்கியராஜ், இவரது நண்பர் ரமேஷ் (35) மற்றும் 2 பேர் சேர்ந்து கார்த்திக்கை மறித்து, முன்விரோதம் தொடர்பாக அவரை திட்டி தாக்கியுள்ளனர். இது குறித்து விக்கிரமங்கலம் போலீசில் கார்த்திக் அளித்த புகாரின்பேரில் பாக்கியராஜ் உள்ளிட்ட 4 பேர் மீதும் சப்-இன்ஸ்பெக்டர் சீனிவாசன் வழக்குப்பதிவு செய்து விசாரணை நடத்தி வருகிறார்.