லாரி மீது கார் மோதல்; பெண் பலி

விராலிமலை:

திருச்சி மாவட்டம், சேதுரெத்தினபுரத்தை சேர்ந்தவர் முகமது கனி. இவரது மனைவி ஆயிஷா பேகம் (வயது 45). இவர் தனது மகன் முகமது ஈசாக் (25), மகள் சகானா பர்வீன் மற்றும் 2 பேரக்குழந்தைகளுடன் காரில் மணப்பாறையில் இருந்து விராலிமலை நோக்கி வந்துள்ளனர். காரை முகமது ஈசாக் ஓட்டினார். விராலிமலை அருகே கோடாலிக்குடி அருகே வந்த போது, அந்த வழியாக வந்த லாரி மீது எதிர்பாராதவிதமாக கார் மோதியது.

இதில் காரில் இருந்த ஆயிஷா பேகம், முகமது ஈசாக், சகானா பர்வீன் மற்றும் 2 சிறுவர்களும் படுகாயமடைந்தனர். இதுகுறித்து தகவல் அறிந்த விராலிமலை போலீசார் சம்பவ இடத்திற்கு விரைந்து வந்து படுகாயமடைந்த 5 பேரையும் மீட்டு சிகிச்சைக்காக மணப்பாறை அரசு மருத்துவமனைக்கு அனுப்பி வைத்தனர். அங்கு ஆயிஷா பேகத்தை பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர். இதுகுறித்து விராலிமலை போலீசார் வழக்குப்பதிவு செய்து விசாரணை நடத்தி வருகின்றனர்.