மோட்டார் சைக்கிள் மீது கார் மோதல்; தொழிலாளி பலி

சாத்தான்குளம்:

சாத்தான்குளம் அருகே மோட்டார் சைக்கிள் மீது கார் மோதிய விபத்தில் தச்சு தொழிலாளி பலியானார். மற்றொருவர் படுகாயம் அடைந்தார்.

தச்சு தொழிலாளி

தூத்துக்குடி மாவட்டம் சாத்தான்குளம் அருகே உடன்குடி- திசையன்விளை சாலையைச் சேர்ந்தவர் ஆண்டி மகன் முத்துக்குமார் (வயது 38). உடன்குடி வைத்தியலிங்கபுரத்தை சேர்ந்த இசக்கிமுத்து மகன் மாணிக்கம் (28). நண்பர்களான இவர்கள் இருவரும் தச்சு வேலை செய்து வருகின்றனர்.

இந்தநிலையில் நேற்று முன்தினம் இரவு இருவரும் மோட்டார் சைக்கிளில் சாத்தான்குளத்தில் உள்ள ஒரு தியேட்டருக்கு சென்று சினிமா பார்த்துள்ளனர். பின்னர் இருவரும் நள்ளிரவில் மோட்டார்சைக்கிளில் ஊருக்கு திரும்பி கொண்டிருந்தனர்.

கார் மோதி பலி

சாத்தான்குளம் அருகே இட்டமொழி சாலையில் அரசு கல்லூரி அருகே சென்று கொண்டிருந்தபோது எதிரே வந்த கார், மோட்டார் சைக்கிள் மீது மோதியது. இதில் முத்துக்குமார் தூக்கி வீசப்பட்டு சம்பவ இடத்திலேயே பரிதாபமாக இறந்தார்.

அவரது நண்பர் மாணிக்கம் படுகாயம் அடைந்து தூத்துக்குடி அரசு மருத்துவமனையில் சேர்க்கப்பட்டு சிகிச்சை பெற்று வருகிறார். இந்த விபத்து குறித்து சாத்தான்குளம் போலீசார் விசாரணை நடத்தி வருகின்றனர்.