தேவதானப்பட்டி அருகே கஞ்சா செடி வளர்த்தவர் கைது

தேவதானப்பட்டி அருகே உள்ள செங்குளத்துபட்டியில் கஞ்சா செடி வளர்க்கப்படுவதாக போலீசாருக்கு ரகசிய தகவல் கிடைத்தது. அதன்பேரில் தேவதானப்பட்டி போலீஸ் சப்-இன்ஸ்பெக்டர் வேல் மணிகண்டன் தலைமையிலான போலீசார் செங்குளத்துபட்டியில் சோதனை நடத்தினர்.

அப்போது அதே ஊரை சேர்ந்த பெருமாள் (வயது 30) என்பவர் தனது வீட்டின் பின்புறம் கஞ்சா செடியை வளர்த்தது கண்டுபிடிக்கப்பட்டது. இதையடுத்து பெருமாள் மீது போலீசார் வழக்குப்பதிவு செய்து, அவரை கைது செய்தனர். மேலும் அவரது வீட்டின் பின்புறம் இருந்த செடியை பிடுங்கி, அதனை அழித்தனர்.