காட்டெருமை தாக்கி கன்றுக்குட்டி சாவு

ஊட்டி

மஞ்சூர் பஜார் பகுதியில் கடந்த சில மாதங்களாக காட்டெருமை நடமாட்டம் அதிகரித்து உள்ளது. இந்தநிலையில் கடந்த சில நாட்களுக்கு முன்பு மஞ்சூர் அருகே பெங்கால்மட்டம் பகுதியில் காட்டெருமை ஊருக்குள் புகுந்தது. அப்போது அந்த வழியாக வந்த கன்றுக்குட்டியை காட்டெருமையை முட்டி தூக்கி வீசியது. இதில் கன்றுக்குட்டி சம்பவ இடத்திலேயே இறந்தது. பின்னர் காட்டெருமை வனப்பகுதிக்கு சென்றது. அப்பகுதியில் காட்டெருமை கன்றுக்குட்டியை முட்டி தூக்கி வீசும் காட்சியை ஒருவர் செல்போனில் வீடியோ எடுத்து உள்ளார். அந்த வீடியோ சமூக வலைத்தளத்தில் வைரலாகி வருகிறது. இதுகுறித்து பொதுமக்கள் கூறுகையில், காட்டெருமை நடமாட்டத்தால் பொதுமக்கள் வெளியில் சென்று வர அச்சம் அடைந்து உள்ளனர். எனவே, பொதுமக்களை தாக்கி உயிர்ப்பலி ஏற்படும் முன்பு காட்டெருமைகளை ஊருக்குள் வரவிடாமல் அடர்ந்த வனப்பகுதிக்குள் விரட்ட வனத்துறையினர் நடவடிக்கை எடுக்க வேண்டும் என்றனர்.